ഗോളുമായി ഫാറ്റി തിരിച്ചെത്തി, ബാഴ്‌സക്ക്‌ തകർപ്പൻ ജയം!

ലാലിഗയിൽ ഇന്നലെ നടന്ന മത്സരത്തിൽ കരുത്തരായ ബാഴ്‌സക്ക്‌ തകർപ്പൻ ജയം. എതിരില്ലാത്ത മൂന്ന് ഗോളിനാണ് ബാഴ്‌സ ലെവാന്റെയെ തകർത്തു വിട്ടത്. പരിക്ക് മൂലം ദീർഘകാലം പുറത്തിരുന്ന അൻസു ഫാറ്റി ഗോളുമായി തിരിച്ചെത്തിയതാണ് ഈ മത്സരത്തിൽ ആരാധകർക്ക്‌ ആവേശം നൽകിയ കാര്യം. ശേഷിച്ച ഗോളുകൾ ഡീപേ, ലൂക്ക് ഡി യോങ് എന്നിവർ നേടി.ജയത്തോടെ ബാഴ്‌സ പോയിന്റ് ടേബിളിൽ ആറാമതെത്തിയിട്ടുണ്ട്.6 മത്സരങ്ങളിൽ നിന്ന് 12 പോയിന്റാണ് ബാഴ്‌സയുടെ സമ്പാദ്യം.

ലൂക്ക്, ഡീപേ, കൂട്ടീഞ്ഞോ എന്നിവരായിരുന്നു ബാഴ്‌സയുടെ മുന്നേറ്റനിരയിൽ.മത്സരത്തിന്റെ തുടക്കത്തിൽ തന്നെ ബാഴ്‌സക്ക്‌ ലഭിച്ച പെനാൽറ്റി ഡീപേ ലക്ഷ്യം കാണുകയായിരുന്നു.14-ആം മിനിറ്റിൽ ബാഴ്‌സയുടെ രണ്ടാം ഗോളും പിറന്നു.സെർജിനോ ഡെസ്റ്റിന്റെ അസിസ്റ്റിൽ നിന്നാണ് ലൂക്ക് ഡി യോങ്ങാണ് ഗോൾ നേടിയത്. താരത്തിന്റെ ബാഴ്‌സ ജേഴ്സിയിലുള്ള ആദ്യ ഗോളായിരുന്നു ഇത്.മത്സരത്തിന്റെ 81-ആം മിനുട്ടിലാണ് ഫാറ്റി കളത്തിലേക്കെത്തുന്നത്.91-ആം മിനുട്ടിൽ ഫാറ്റി മനോഹരമായ ഒരു ഗോൾ നേടുകയും ചെയ്തു. താരത്തിന്റെ തിരിച്ചു വരവ് ആരാധകർക്ക്‌ വലിയ ആശ്വാസം നൽകുന്ന കാര്യമാണ്.