ക്രിസ്റ്റ്യാനോ ടീം വിട്ടതോടെയാണ് എന്റെ കളി തന്നെ മാറിയത് : തുറന്ന് പറച്ചിലുമായി ബെൻസിമ!

2018ലായിരുന്നു റയൽ മാഡ്രിഡിന്റെ നെടുംതൂണായിരുന്ന സൂപ്പർ താരം ക്രിസ്റ്റ്യാനോ റൊണാൾഡോ ക്ലബ്ബിനോട് വിട പറഞ്ഞുകൊണ്ട് യുവന്റസിലേക്ക് ചേക്കേറിയത്. അതോടെ റയൽ മാഡ്രിഡിൽ ചെറിയ പ്രതിസന്ധി രൂപപ്പെട്ടു. പ്രത്യേകിച്ച് ഗോളുകൾ നേടുന്നതിലായിരുന്നു പ്രതിസന്ധി ഉണ്ടായത്.

എന്നാൽ സൂപ്പർ താരം ബെൻസിമ റൊണാൾഡോയുടെ ചുമതല ഏറ്റെടുക്കുകയായിരുന്നു. കൂടുതൽ ഗോളുകൾ നേടുന്ന ബെൻസിമയെയാണ് കഴിഞ്ഞ കുറച്ചു വർഷങ്ങളായി നമുക്ക് കാണാൻ സാധിക്കുന്നത്. കഴിഞ്ഞ സീസണിൽ തകർപ്പൻ പ്രകടനമായിരുന്നു ബെൻസിമ പുറത്തെടുത്തത്.

ഇപ്പോൾ ഇതേക്കുറിച്ച് ബെൻസിമ ചില കാര്യങ്ങൾ പങ്കുവെച്ചിട്ടുണ്ട്.അതായത് റൊണാൾഡോ പോയതോടുകൂടി തനിക്ക് കൂടുതൽ ഗോളുകൾ നേടാൻ കഴിഞ്ഞു എന്നാണ് ബെൻസിമ പറഞ്ഞത്.അദ്ദേഹത്തിന്റെ വാക്കുകൾ ഇങ്ങനെയാണ്.

” എനിക്കിപ്പോൾ കൂടുതൽ ഗോളുകൾ നേടാൻ കഴിയുന്നുണ്ട് എന്നുള്ളത് ശരി തന്നെയാണ്. പക്ഷേ റൊണാൾഡോ ഉണ്ടായിരുന്ന സമയത്ത് ഞങ്ങൾക്ക് വ്യത്യസ്തമായ കളി ശൈലിയായിരുന്നു ഉണ്ടായിരുന്നത്. ഞാൻ കൂടുതൽ അസിസ്റ്റുകൾ നൽകിയിരുന്നു.അദ്ദേഹം കളത്തിന് അകത്തും കളത്തിന് പുറത്തും എനിക്ക് ഒരുപാട് സഹായങ്ങൾ നൽകിയിട്ടുണ്ട്. പക്ഷേ അദ്ദേഹം ക്ലബ്ബ് വിട്ട സമയത്ത് എന്റെ കളി മാറ്റേണ്ട സമയമായി എന്ന് എനിക്ക് മനസ്സിലാക്കാൻ കഴിഞ്ഞു.പിന്നീട് എന്റെ കളി ശൈലി മാറി.എന്റെ ആഗ്രഹങ്ങൾക്കും മാറ്റം വന്നു. നിലവിൽ നല്ല രൂപത്തിലാണ് ഞാൻ അതൊക്കെ കൈകാര്യം ചെയ്യുന്നത് എന്നാണ് ഞാൻ വിശ്വസിക്കുന്നത് ” ഇതാണ് ബെൻസിമ പറഞ്ഞിട്ടുള്ളത്.

ഈ വർഷത്തെ ബാലൺ ഡി’ഓറിന് ഏറ്റവും കൂടുതൽ സാധ്യത കൽപ്പിക്കപ്പെടുന്ന താരം കൂടിയാണ് ബെൻസിമ.മാത്രമല്ല വരുന്ന ഖത്തർ വേൾഡ് കപ്പിൽ ഫ്രാൻസിന്റെ പ്രതീക്ഷകൾ ഈ താരത്തിലുമാണ്.