ക്രിസ്റ്റ്യാനോയുമായി പ്രശ്നത്തിലാണോ? തുറന്നുപറഞ്ഞ് ബെയ്ൽ!

സൂപ്പർ താരങ്ങളായ ക്രിസ്റ്റ്യാനോ റൊണാൾഡോയും ഗാരത് ബെയ്ലും ഒരുപാട് വർഷങ്ങൾ റയൽ മാഡ്രിഡിൽ ഒരുമിച്ച് ചിലവഴിച്ചവരാണ്.ഹാട്രിക്ക് ചാമ്പ്യൻസ് ലീഗ് കിരീടമുൾപ്പെടെ നിരവധി കിരീടങ്ങൾ ഇരുവരും നേടിയിട്ടുണ്ട്. ഈ കാലയളവിലായിരുന്നു വിഖ്യാതമായ ബിബിസി ത്രയം ഉണ്ടായിരുന്നത്. എന്നാൽ ക്രിസ്റ്റ്യാനോ റൊണാൾഡോയും ബെയ്ലും തമ്മിൽ പ്രശ്നങ്ങൾ ഉണ്ടായിരുന്നുവെന്ന് ചില മാധ്യമങ്ങൾ റിപ്പോർട്ട് ചെയ്തിരുന്നു.

ആ വിഷയത്തിൽ ഇപ്പോൾ ബെയ്ൽ ഒരു വ്യക്തത വരുത്തിയിട്ടുണ്ട്.തനിക്ക് ആരുമായും യാതൊരുവിധ പ്രശ്നങ്ങളും ഇല്ലായിരുന്നു എന്നാണ് ബെയ്ൽ ഇപ്പോൾ പറഞ്ഞിട്ടുള്ളത്.റയൽ മാഡ്രിഡിലെ സമയം താൻ നന്നായി ആസ്വദിച്ചിരുന്നുവെന്നും പ്രൊഫഷണൽ ഫുട്ബോളിൽ നിന്നും വിരമിച്ചതിൽ തനിക്ക് ഖേദമൊന്നും ഇല്ലെന്നും ബെയ്ൽ കൂട്ടിച്ചേർത്തിട്ടുണ്ട്. അദ്ദേഹത്തിന്റെ വാക്കുകളെ ഗോൾ ഡോട്ട് കോം റിപ്പോർട്ട് ചെയ്യുന്നത് ഇങ്ങനെയാണ്.

“ഞാൻ എല്ലാ താരങ്ങളുമായും നല്ല ബന്ധം പുലർത്തിയിരുന്നു.ആളുകൾ പലതും സംസാരിക്കുമെന്ന് എനിക്കറിയാം.പക്ഷേ എനിക്ക് റൊണാൾഡോയുമായോ അല്ലെങ്കിൽ മറ്റാരെങ്കിലുമായോ ഒരൊറ്റ പ്രശ്നം പോലും ഇല്ലായിരുന്നു.ആരോടും ഞാൻ ഇതുവരെ തർക്കിച്ചിട്ടു പോലുമില്ല.ബുദ്ധിമുട്ടേറിയ സമയങ്ങളിൽ പോലും ഡ്രസ്സിംഗ് റൂമിൽ നല്ല നിലയിലായിരുന്നു. കളിക്കളത്തിനകത്ത് ചില ബുദ്ധിമുട്ടുകൾ മാറ്റി നിർത്തിയാൽ റയൽ മാഡ്രിഡിലെ എല്ലാസമയവും ഞാൻ ആസ്വദിച്ചിരുന്നു. എനിക്ക് യാതൊരുവിധ ഖേദവുമില്ല.ഞാൻ ശരിയായ തീരുമാനമാണ് എടുത്തിരിക്കുന്നത് ” ബെയ്ൽ പറഞ്ഞു.

33ആം വയസ്സിൽ തന്നെ ബെയ്ൽ ഫുട്ബോളിൽ നിന്നും വിരമിക്കൽ പ്രഖ്യാപിക്കുകയായിരുന്നു. അതേസമയം 38 കാരനായ റൊണാൾഡോ ഇപ്പോഴും തകർപ്പൻ പ്രകടനമാണ് പുറത്തെടുക്കുന്നത്.കഴിഞ്ഞ സീസണിൽ സൗദി അറേബ്യൻ ക്ലബ്ബിന് വേണ്ടി 14 ഗോളുകൾ പൂർത്തിയാക്കാൻ റൊണാൾഡോക്ക് സാധിച്ചിരുന്നു.