ക്രിസ്റ്റ്യാനോയുടെ ലോക്കർ റയൽ ലേലം ചെയ്യുന്നു!

സമീപകാലത്ത് ഒരുപാട് ഇതിഹാസങ്ങൾ കളിച്ചിട്ടുള്ള ക്ലബ്ബാണ് റയൽ മാഡ്രിഡ്. എപ്പോഴും താര സമ്പന്നമായ നിര അവകാശപ്പെടാൻ ഇവർക്ക് സാധിക്കാറുണ്ട്. സൂപ്പർ താരം ക്രിസ്റ്റ്യാനോ റൊണാൾഡോ ഒരുപാട് കാലം മാഡ്രിഡിന് വേണ്ടി കളിക്കുകയും തങ്ങൾ സ്വന്തമാക്കുകയും ചെയ്തിട്ടുണ്ട്.സിദാൻ,റൊണാൾഡോ നസാരിയോ എന്നിവരൊക്കെ റയൽ മാഡ്രിഡിന് വേണ്ടി കളിച്ച ഇതിഹാസങ്ങളാണ്.

ഈ ക്ലബ്ബുമായി ബന്ധപ്പെട്ട ഒരു വാർത്ത ഇപ്പോൾ പുറത്തേക്ക് വന്നിട്ടുണ്ട്. അതായത് ഈ ഇതിഹാസങ്ങൾ ഡ്രസ്സിംഗ് റൂമിൽ ഉപയോഗിച്ചിരുന്ന ലോക്കർ റയൽ മാഡ്രിഡ് ഇപ്പോഴും സൂക്ഷിക്കുന്നുണ്ട്.എന്നാൽ ഇനി അത് സൂക്ഷിക്കാൻ അവർ ഉദ്ദേശിക്കുന്നില്ല. മറിച്ച് ലേലത്തിൽ വെക്കാനാണ് അവർ തീരുമാനിച്ചിരിക്കുന്നത്. സ്പാനിഷ് മാധ്യമങ്ങളാണ് ഇക്കാര്യം റിപ്പോർട്ട് ചെയ്തിട്ടുള്ളത്.

24 താരങ്ങളുടെ ലോക്കറുകളാണ് റയൽ മാഡ്രിഡ് ലേലത്തിൽ വെക്കുന്നത്.ക്രിസ്റ്റ്യാനോ റൊണാൾഡോ,സിനദിൻ സിദാൻ,ഡേവിഡ് ബെക്കാം, ലൂയിസ് ഫിഗോ, റൊണാൾഡോ നസാരിയോ തുടങ്ങിയ ഇതിഹാസങ്ങൾ ഉപയോഗിച്ച ലോക്കറുകൾ ആർക്ക് വേണമെങ്കിലും ലേലത്തിലൂടെ സ്വന്തമാക്കാൻ സാധിക്കും.2002നും 2022 നും ഇടയിൽ കളിച്ച താരങ്ങളുടെ ലോക്കറുകളാണ് ഈ ലേലത്തിൽ ലഭ്യമാവുക.

അടിസ്ഥാന വിലയായി കൊണ്ട് 10000 പൗണ്ട് ആണ് നിശ്ചയിച്ചിരിക്കുന്നത്. മാത്രമല്ല ഈ ലേലത്തിലൂടെ ലഭിക്കുന്ന തുകയുടെ നല്ലൊരു ഭാഗം ചാരിറ്റിക്ക് വേണ്ടി ഉപയോഗപ്പെടുത്തുമെന്നും റിപ്പോർട്ടുകൾ ചൂണ്ടിക്കാണിക്കുന്നുണ്ട്. റയൽ മാഡ്രിഡ് ഫൗണ്ടേഷൻ വഴിയാണ് ചാരിറ്റി നടത്തുക.ഈ 26 തീയതി വരെയാണ് ലേലം ഉണ്ടാവുക. ഈയിടെ സാന്റിയാഗോ ബെർണാബു നവീകരിച്ചിരുന്നു. അതിന്റെ ഭാഗമായി കൊണ്ടാണ് ഈ ലോക്കറുകൾ ഒഴിവാക്കാൻ ക്ലബ്ബ് തീരുമാനിച്ചിട്ടുള്ളത്. ആർക്ക് വേണമെങ്കിലും ഓൺലൈനിലൂടെ ഈ ലേലത്തിൽ പങ്കെടുക്കാൻ സാധിക്കുന്നതാണ്.