ക്രിസ്റ്റ്യാനോക്കൊപ്പം എത്തുക എന്നുള്ളത് അസാധ്യം : തുറന്ന് സമ്മതിച്ച് ബെൻസിമ!

കഴിഞ്ഞ സീസണിലെ ഏറ്റവും മികച്ച താരത്തിനുള്ള യുവേഫയുടെ പുരസ്കാരം ഇന്നലെ ബെൻസിമ സ്വന്തമാക്കിയിരുന്നു. മികച്ച പ്രകടനമായിരുന്നു കഴിഞ്ഞ സീസണിൽ ബെൻസിമ നടത്തിയിരുന്നത്. അതിന്റെ ഫലമായി കൊണ്ടായിരുന്നു റയൽ മാഡ്രിഡ് യുവേഫ ചാമ്പ്യൻസ് ലീഗ് കിരീടവും ലാലിഗയും സ്വന്തമാക്കിയത്.

ഏതായാലും ഈയൊരു പുരസ്കാര നേട്ടത്തിൽ ബെൻസിമ സന്തോഷം പ്രകടിപ്പിച്ചിട്ടുണ്ട്. കൂടാതെ സൂപ്പർ താരം ക്രിസ്റ്റ്യാനോ റൊണാൾഡോയെയും ഈയൊരു വേളയിൽ അദ്ദേഹം പരാമർശിച്ചിട്ടുണ്ട്. അതായത് റൊണാൾഡോ തന്നെ ഒരുപാട് സഹായിച്ചിട്ടുണ്ടെന്നും അദ്ദേഹം റയലിൽ നേടിയ ഗോളുകളുടെ കാര്യത്തിൽ ഒപ്പമെത്തുക എന്നുള്ളത് അസാധ്യമാണ് എന്നുമാണ് ബെൻസിമ പറഞ്ഞിട്ടുള്ളത്. അദ്ദേഹത്തിന്റെ വാക്കുകളെ മാർക്ക റിപ്പോർട്ട് ചെയ്യുന്നത് ഇങ്ങനെയാണ്.

“ക്രിസ്റ്റ്യാനോ എന്നെ വളരെയധികം സഹായിച്ചിട്ടുണ്ട്. അദ്ദേഹത്തോടൊപ്പം എനിക്ക് മറ്റൊരു റോൾ ആയിരുന്നു ഉണ്ടായിരുന്നത്. അദ്ദേഹം ക്ലബ്ബ് വിട്ടതോടെ കൂടുതൽ ഗോളുകൾ നേടേണ്ട ചുമതല എനിക്കായി. അദ്ദേഹം ക്ലബ്ബ് വിട്ടത് മുതൽ എനിക്ക് സംഭവിച്ച മാറ്റം ഗോളുകളുടെ കാര്യത്തിൽ തന്നെയാണ്.പക്ഷേ അന്നും ഇന്നും ഒരേ രൂപത്തിൽ തന്നെയാണ് ഞാൻ കളിക്കുന്നത്.ഞാൻ റയൽ മാഡ്രിഡ് ഇതിഹാസങ്ങളുമായി വളരെയധികം പിന്നിലല്ല എന്നാണ് കണക്കുകൾ തെളിയിക്കുന്നത്. പക്ഷേ ഗോളുകളുടെ കാര്യത്തിൽ റൊണാൾഡോക്ക് ഒപ്പമെത്തുക എന്നുള്ളത് അസാധ്യമാണ് എന്നെനിക്കറിയാം.റെക്കോർഡുകൾക്കല്ല, ടീമിനാണ് ഞാൻ പ്രാധാന്യം നൽകാറുള്ളത്. ഗോളുകൾക്കോ കിരീടങ്ങൾക്കോ വേണ്ടി മാത്രമല്ല ഞാൻ കളിക്കാറുള്ളത്.പക്ഷെ ബാലൺ ഡിയോർ നേടുക,വേൾഡ് കപ്പ് നേടുക എന്നുള്ള സ്വപ്നങ്ങളൊക്കെയും എനിക്കുണ്ട് ” ഇതാണ് ബെൻസിമ പറഞ്ഞിട്ടുള്ളത്.

ഇത്തവണത്തെ ബാലൺ ഡിയോർ പുരസ്കാരത്തിന് ഏറ്റവും കൂടുതൽ സാധ്യത കൽപ്പിക്കപ്പെടുന്ന താരം ബെൻസിമയാണ്.അദ്ദേഹം നേടുമെന്ന് തന്നെയാണ് ആരാധകർ പ്രതീക്ഷിക്കുന്നത്.