ക്രിസ്റ്റ്യാനോക്കൊപ്പം സന്തോഷവാനായിരുന്നു, അദ്ദേഹം പോയത് മാറ്റങ്ങളുണ്ടാക്കി: ബെൻസിമ

സൂപ്പർ താരം ക്രിസ്റ്റ്യാനോ റൊണാൾഡോ റയൽ വിട്ടതിന് ശേഷം റയലിന്റെ ഗോളടി ചുമതല ഏറ്റെടുത്തത് കരിം ബെൻസിമയായിരുന്നു. പലപ്പോഴും ബെൻസിമയുടെ ഗോളടിയെ ആശ്രയിച്ചായിരുന്നു റയലിന്റെ നിലനിൽപ്പ്. കഴിഞ്ഞ സീസണിൽ 21 ഗോളുകൾ നേടിക്കൊണ്ട് റയലിനെ ലാലിഗ കിരീടം ചൂടാൻ സഹായിച്ചത് ബെൻസിമയായിരുന്നു. ഈ സീസണിലും റയലിന്റെ ടോപ് സ്‌കോറർ ബെൻസിമ തന്നെയാണ്. നിലവിൽ പരിക്ക് കാരണം പുറത്തിരിക്കുന്ന ബെൻസിമ ഇന്നലെയൊരു അഭിമുഖം നൽകിയിരുന്നു.ഐക്കൺ മാഗസിന് നൽകിയ അഭിമുഖത്തിൽ തന്റെ മുൻ സഹതാരമായ ക്രിസ്റ്റ്യാനോ റൊണാൾഡോയെ കുറിച്ച് മനസ് തുറന്നിരുന്നു. ക്രിസ്റ്റ്യാനോക്കൊപ്പം താൻ സന്തോഷവാനായിരുന്നുവെന്നും അദ്ദേഹം പോയതോടെ ടീമിലെ തന്റെ റോളിൽ മാറ്റമുണ്ടായെന്നും ബെൻസിമ അറിയിച്ചു.

” ഞാൻ ക്രിസ്റ്റ്യാനോക്കൊപ്പം വളരെയധികം സന്തോഷവാനായിരുന്നു.പക്ഷെ അദ്ദേഹം ക്ലബ് വിട്ട് പോയത് റയലിൽ മറ്റൊരു റോളിൽ കളിക്കാൻ എന്നെ പ്രാപ്തനാക്കി. അത്‌ മാറ്റങ്ങൾ ഉണ്ടാക്കുകയും ചെയ്തു.അദ്ദേഹം അമ്പതോ അതിൽ കൂടുതലോ ഗോളുകൾ ഒരു വർഷം നേടുമായിരുന്നു.അത്കൊണ്ട് തന്നെ അദ്ദേഹത്തിന്റെ കളിയുമായി ഞാൻ അഡാപ്റ്റ് ചെയ്യേണ്ടിയിരുന്നു.ലോകത്തിലെ ഏറ്റവും മികച്ച താരങ്ങളിൽ ഒരാളാണ് ക്രിസ്റ്റ്യാനോ റൊണാൾഡോ. അദ്ദേഹത്തിന്റെ കാര്യത്തിൽ എനിക്ക് സന്തോഷമുണ്ട്.2009 മുതലാണ് റൊണാൾഡോയും ബെൻസിമയും ഒപ്പം കളിച്ചു തുടങ്ങിയത്. റയൽ മാഡ്രിഡിന്റെ കിരീടനേട്ടങ്ങളിൽ നിർണായക പങ്ക് വഹിച്ചവരാണ് ഇരുവരും.