കരഞ്ഞ് കലങ്ങിയ കണ്ണുകളുമായി എൻഡ്രിക്ക് ക്ലബ്ബ് വിട്ടു,ഇനി റയലിൽ!
ബ്രസീലിയൻ യുവ സൂപ്പർതാരമായ എൻഡ്രിക്ക് തന്റെ ക്ലബ്ബായ പാൽമിറാസിനോടൊപ്പമുള്ള അവസാനത്തെ മത്സരവും കളിച്ചു കഴിഞ്ഞിട്ടുണ്ട്. ഇന്നലെ നടന്ന കോപ ലിബർട്ടഡോറസ് മത്സരത്തിൽ സാൻ ലോറൻസോയായിരുന്നു പാൽമിറാസിന്റെ എതിരാളികൾ. മത്സരത്തിന്റെ എഴുപതാം മിനിട്ട് വരെ എൻഡ്രിക്ക് കളിച്ചിരുന്നു. പിന്നീട് അദ്ദേഹം തന്റെ ക്ലബ്ബിനോട് വിട പറയുകയായിരുന്നു.
മത്സരത്തിന് വേണ്ടി അണിനിരക്കുന്ന സമയത്ത് തന്നെ കണ്ണീരോട് കൂടിയായിരുന്നു എൻഡ്രിക്ക് ഉണ്ടായിരുന്നത്. വളരെയധികം ഇമോഷണലായ ഒരു ഫെയർ വെൽ തന്നെയാണ് താരത്തിന് ലഭിച്ചത്.എൻഡ്രിക്കിന് വേണ്ടി ഒരു വലിയ ടിഫോ അവരുടെ ആരാധകർ ഒരുക്കുകയും ചെയ്തിരുന്നു. സ്പാനിഷ് വമ്പൻമാരായ റയൽ മാഡ്രിഡിലേക്കാണ് താരം പോകുന്നത്.അടുത്ത സീസണിൽ അദ്ദേഹം റയൽ മാഡ്രിഡ് ജേഴ്സിയിലാണ് ഉണ്ടാവുക.
പതിനൊന്നാമത്തെ വയസ്സിലാണ് താരം പാൽമിറാസിൽ എത്തിയത്.രണ്ട് ബ്രസീലിയൻ ലീഗ് കിരീടം, രണ്ട് പൗളിസ്റ്റാവോ കിരീടം, ഒരു സൂപ്പർ കോപ്പ,ഒരു കോപ്പിഞ്ഞ എന്നീ കിരീടങ്ങളൊക്കെ അദ്ദേഹം ഈ ക്ലബ്ബിനോടൊപ്പം സ്വന്തമാക്കിയിട്ടുണ്ട്. 16 വയസ്സുള്ളപ്പോൾ തന്നെ അദ്ദേഹത്തെ റയൽ മാഡ്രിഡ് വലിയ ഒരു തുകക്ക് പാൽമിറാസിൽ നിന്നും സ്വന്തമാക്കിയിരുന്നു. വരുന്ന ജൂലൈ മാസത്തിലാണ് എൻഡ്രിക്ക് റയൽ മാഡ്രിഡ്നോടൊപ്പം ജോയിൻ ചെയ്യുക.
നിലവിൽ ബ്രസീലിയൻ ക്യാമ്പിലേക്ക് അദ്ദേഹം പോകുന്നത്.കോപ അമേരിക്ക ടീമിൽ ഇടം നേടാൻ ഈ യുവ പ്രതിഭക്ക് കഴിഞ്ഞിട്ടുണ്ട്. രണ്ട് സൗഹൃദ മത്സരങ്ങൾക്ക് ശേഷമാണ് ബ്രസീൽ കോപ്പ അമേരിക്കയിൽ പങ്കെടുക്കുക. കഴിഞ്ഞ ഇംഗ്ലണ്ടിനെതിരെയുള്ള മത്സരത്തിലും സ്പെയിനിനെതിരെയുള്ള മത്സരത്തിലും ബ്രസീലിനു വേണ്ടി ഗോളുകൾ നേടിയ താരമാണ് എൻഡ്രിക്ക്.അതുവഴി നിരവധി റെക്കോർഡുകൾ അദ്ദേഹം സ്വന്തമാക്കുകയും ചെയ്തിരുന്നു. വരുന്ന സൗഹൃദ മത്സരങ്ങളിലും കോപ്പ അമേരിക്കയിലും എൻഡ്രിക്കിനെ ബ്രസീൽ പരിശീലകൻ ഡൊറിവാൽ ജൂനിയർ ഉപയോഗപ്പെടുത്തുമെന്ന് തന്നെയാണ് ആരാധകർ പ്രതീക്ഷിക്കുന്നത്.
