ഒരു സെക്കന്റ് പോലും ശ്വാസം വിടാൻ അനുവദിക്കാത്ത താരമാണവൻ : ക്രിസ്റ്റ്യാനോയെ കുറിച്ച് ഡാനി ആൽവസ്!

ദീർഘകാലം സ്പാനിഷ് വമ്പൻമാരായ ബാഴ്സലോണയുടെ പ്രതിരോധനിരയിലെ നിർണായക താരമായിരുന്നു ബ്രസീലിയൻ സൂപ്പർ താരമായ ഡാനി ആൽവസ്. ഇതേ കാലഘട്ടത്തിൽ തന്നെയായിരുന്നു സൂപ്പർ താരം ക്രിസ്റ്റ്യാനോ റൊണാൾഡോ റയലിന് വേണ്ടി കളിച്ചിരുന്നത്. അന്നത്തെ എൽ ക്ലാസിക്കോകൾ പലപ്പോഴും ഒരു യുദ്ധത്തിന് സമാനമായിരുന്നു.അത്രയേറെ തീവ്രത നിറഞ്ഞ മത്സരത്തിൽ റൊണാൾഡോയെ തളക്കേണ്ട ചുമതല പലപ്പോഴും ഡാനി ആൽവസിനുമുണ്ടായിരുന്നു.

ഇപ്പോഴിതാ താൻ തന്റെ കരിയറിൽ നേരിട്ട ഏറ്റവും ബുദ്ധിമുട്ടേറിയ എതിരാളി, അത് ക്രിസ്റ്റ്യാനോ റൊണാൾഡോയാണ് എന്നുള്ളത് ഡാനി ആൽവസ് തുറന്ന് സമ്മതിച്ചിട്ടുണ്ട്. ഒരു സെക്കന്റ് പോലും ശ്വാസം വിടാൻ അനുവദിക്കാത്ത താരമാണ് ക്രിസ്റ്റ്യാനോ എന്നാണ് ഡാനി ആൽവസ് പറഞ്ഞിട്ടുള്ളത്.ഹ്യൂഗോ സാഞ്ചസുമായുള്ള അഭിമുഖത്തിൽ സംസാരിക്കുകയായിരുന്നു അദ്ദേഹം.ഡാനിയുടെ വാക്കുകൾ ഇങ്ങനെയാണ്.

” ഞാൻ നേരിട്ട ഏറ്റവും കടുത്ത എതിരാളി,അത് ക്രിസ്റ്റ്യാനോ റൊണാൾഡോയാണ്. ഒരു സെക്കൻഡ് പോലും ശ്വാസം വിടാൻ അനുവദിക്കാത്ത താരമാണവൻ. ഞാനങ്ങനെ മോശമായിട്ട് ഒന്നും ചെയ്യാറില്ല. പക്ഷേ റൊണാൾഡോയെ ഡിഫൻഡ് ചെയ്യുക എന്നുള്ളത് വളരെയധികം ബുദ്ധിമുട്ടുള്ള ഒരു കാര്യമാണ്. അദ്ദേഹം ഒരു ഗോൾ സ്കോറിങ് മെഷീനാണ് ” ഇതാണ് ഡാനി ആൽവസ് പറഞ്ഞിട്ടുള്ളത്.

നിലവിൽ ഡാനി ആൽവസും ക്രിസ്റ്റ്യാനോ റൊണാൾഡോയും തങ്ങളുടെ കരിയറിന്റെ അവസാന കാലഘട്ടത്തിലൂടെയാണ് കടന്നുപോയിക്കൊണ്ടിരിക്കുന്നത്. മെക്സിക്കൻ ക്ലബ്ബായ പ്യുമാസിന് വേണ്ടിയാണ് നിലവിൽ ഡാനി ആൽവസ് കളിക്കുന്നത്.39 കാരനായ താരം വിരമിക്കലിനെ കുറിച്ച് ആലോചിക്കുന്നില്ല എന്നാണ് ഇപ്പോൾ പറഞ്ഞിട്ടുള്ളത്. അതേസമയം 37കാരനായ റൊണാൾഡോ നിലവിൽ യുണൈറ്റഡിന് വേണ്ടി കളിച്ചുകൊണ്ടിരിക്കുന്നു. ഈ സീസണിലെ ആദ്യ ഗോൾ കഴിഞ്ഞ ഷെറിഫിനെതിരെയുള്ള മത്സരത്തിൽ സ്വന്തമാക്കാൻ താരത്തിന് കഴിഞ്ഞിരുന്നു.