ഒഫീഷ്യൽ – ഡാനി ആൽവസിന് പുതിയ ക്ലബായി!

കഴിഞ്ഞ മാസത്തോടുകൂടി ബ്രസീലിയൻ സൂപ്പർതാരമായ ഡാനി ആൽവസിന്റെ എഫ്സി ബാഴ്സലോണയുമായുള്ള കരാർ അവസാനിച്ചിരുന്നു.ഈ കരാർ പുതുക്കാൻ ബാഴ്സ തയ്യാറായിരുന്നില്ല. അതുകൊണ്ടുതന്നെ ഫ്രീ ഏജന്റായ ഡാനി ആൽവസ് പുതിയ ക്ലബ്ബിന് വേണ്ടിയുള്ള അന്വേഷണത്തിലായിരുന്നു.

ഇപ്പോഴിതാ ഡാനി ആൽവസിന് പുതിയ ക്ലബ്ബായിട്ടുണ്ട്. മെക്സിക്കൻ ക്ലബ്ബായ പ്യൂമാസിലേക്കാണ് ഡാനി ആൽവസ് ചേക്കേറുന്നത്.ഒരു വർഷത്തെ കരാറിലാണ് താരം ഒപ്പുവെക്കുക. ഇക്കാര്യം പ്യൂമാസ് തന്നെ ഇപ്പോൾ ഒഫീഷ്യലായി സ്ഥിരീകരിച്ചിട്ടുണ്ട്.

2023 ജൂൺ വരെയാണ് താരം ഈ മെക്സിക്കൻ ക്ലബ്ബിൽ തുടരുക.ബാഴ്സ വിട്ട ഡാനി ആൽവസ് വേൾഡ് കപ്പ് മുന്നിൽ കണ്ടുകൊണ്ട് യൂറോപ്പിൽ തന്നെ തുടരുമെന്നായിരുന്നു ആരാധകർ പ്രതീക്ഷിച്ചിരുന്നത്. എന്നാൽ അനുയോജ്യമായ ക്ലബ്ബ് ലഭിക്കാത്തതിനാൽ ഡാനി ആൽവസ് മെക്സിക്കോയിലേക്ക് ചേക്കേറുകയായിരുന്നു. കഴിഞ്ഞ ആഴ്ച്ച തന്നെ ഈ കാര്യത്തിൽ ക്ലബ്ബും താരവും തമ്മിൽ ധാരണയിൽ എത്തിയിരുന്നു.

39- കാരനായ ഈ പ്രതിരോധനിരതാരത്തിന് അടുത്ത വേൾഡ് കപ്പിനുള്ള ബ്രസീലിയൻ ടീമിൽ ഇടം നേടണമെങ്കിൽ മികച്ച പ്രകടനം മെക്സിക്കോയിൽ കാഴ്ച്ച വെക്കേണ്ടി വന്നേക്കും. എന്നിരുന്നാലും ഡാനി ആൽവസ് അടുത്ത വേൾഡ് കപ്പിനുള്ള സ്‌ക്വാഡിൽ ഉണ്ടാവുമെന്ന് തന്നെയാണ് പലരും പ്രതീക്ഷിക്കുന്നത്.