എന്റെ ഹൃദയത്തിലാണ് അത് കൊണ്ടത്: ക്രിസ്റ്റ്യാനോക്ക് മറുപടിയുമായി എംബപ്പേ!
കഴിഞ്ഞ ദിവസമായിരുന്നു ഫ്രഞ്ച് സൂപ്പർതാരമായ കിലിയൻ എംബപ്പേ പിഎസ്ജി വിട്ടുകൊണ്ട് റയൽ മാഡ്രിഡിൽ എത്തിയത്. റയൽ മാഡ്രിഡിന്റെ ദീർഘകാലത്തെ പരിശ്രമമാണ് ഇപ്പോൾ ഫലം കണ്ടിട്ടുള്ളത്.എംബപ്പേയെ സംബന്ധിച്ചിടത്തോളം അദ്ദേഹത്തിന്റെ കുട്ടിക്കാലം മുതലേയുള്ള സ്വപ്നമാണ് ഇപ്പോൾ സാക്ഷാത്കാരമായിട്ടുള്ളത്. ചാമ്പ്യൻസ് ലീഗ് കിരീടത്തിന് പിന്നാലെ എംബപ്പേ കൂടി വന്നത് റയൽ മാഡ്രിഡ് ആരാധകർക്ക് ഇരട്ടിമധുരം നൽകിയ കാര്യമാണ്.
മാത്രമല്ല ക്രിസ്റ്റ്യാനോ റൊണാൾഡോയുടെ കമന്റും ആരാധകർക്ക് വളരെയധികം സന്തോഷം നൽകി.സാന്റിയാഗോ ബെർണാബുവിൽ നീ പ്രകാശം പരത്തുന്നത് കാണാൻ ഞാൻ കാത്തിരിക്കുകയാണ് എന്നായിരുന്നു ക്രിസ്റ്റ്യാനോയുടെ കമന്റ്. കൂടാതെ ഐകർ കസിയ്യസ് ഉൾപ്പെടെയുള്ള റയൽ മാഡ്രിഡ് ഇതിഹാസങ്ങളും ഈ സൂപ്പർ താരത്തെ വരവേറ്റിട്ടുണ്ട്. എല്ലാവരോടും എംബപ്പേ നന്ദി പറഞ്ഞിട്ടുണ്ട്.ക്രിസ്റ്റ്യാനോ ഉൾപ്പെടെയുള്ളവരുടെ വാക്കുകൾ തന്റെ ഹൃദയത്തിലാണ് സ്പർശിച്ചത് എന്നാണ് എംബപ്പേ പറഞ്ഞിട്ടുള്ളത്.ഇന്നലത്തെ പ്രസ് കോൺഫറൻസിൽ സംസാരിക്കുകയായിരുന്നു അദ്ദേഹം.എംബപ്പേയുടെ വാക്കുകൾ ഇങ്ങനെയാണ്.
“എന്റെ ഐഡോളുകളായ ക്രിസ്റ്റ്യാനോ റൊണാൾഡോ,റാമോസ്,കസിയ്യസ് എന്നിവരിൽ നിന്നുള്ള മെസ്സേജുകൾ ഒക്കെ ഞാൻ കണ്ടു.കൂടാതെ എന്റെ ഭാവി സഹതാരങ്ങളും മറ്റുള്ളവരും ഒക്കെ എനിക്ക് സന്ദേശങ്ങൾ നൽകിയിട്ടുണ്ട്.അതൊക്കെ എന്റെ ഹൃദയത്തെയാണ് സ്പർശിച്ചിട്ടുള്ളത്. എല്ലാവരോടും ഞാൻ നന്ദി പറയുന്നു ” ഇതാണ് എംബപ്പേ പറഞ്ഞിട്ടുള്ളത്.
എംബപ്പേ വരുന്നതോടുകൂടി റയൽ മാഡ്രിഡിന്റെ കരുത്ത് ഇരട്ടിയാകും എന്ന കാര്യത്തിൽ സംശയങ്ങൾ ഒന്നുമില്ല.താര സമ്പന്നമായ ഒരു യുവനിരയെ ഇപ്പോൾ അവകാശപ്പെടാൻ റയൽ മാഡ്രിഡിന് കഴിയുന്നുണ്ട്.അൽഫോൻസോ ഡേവിസ്,ലെനി യോറോ തുടങ്ങിയ താരങ്ങളെ കൂടി എത്തിക്കാനുള്ള ശ്രമങ്ങൾ ഇപ്പോൾ റയൽ മാഡ്രിഡ് നടക്കുന്നുണ്ട്. വരുന്ന സീസണിൽ തന്നെയാണ് ബ്രസീലിയൻ വണ്ടർ കിഡ് ആയ എൻഡ്രിക്കും റയൽ മാഡ്രിഡിനോടൊപ്പം ജോയിൻ ചെയ്യുക.
