എംബപ്പേ വരട്ടെ,ബാഴ്സയിൽ പൂട്ടാൻ ആളുണ്ട്: വെല്ലുവിളിച്ച് ജോർഡി!

പിഎസ്ജിയുടെ ഫ്രഞ്ച് സൂപ്പർ താരമായ കിലിയൻ എംബപ്പേ ക്ലബ്ബ് വിടുകയാണ്. ഇക്കാര്യം ഒഫീഷ്യലായി കൊണ്ട് എംബപ്പേ തന്നെ അറിയിച്ചിട്ടുണ്ട്. സ്പാനിഷ് വമ്പൻമാരായ റയൽ മാഡ്രിഡിലേക്കാണ് അദ്ദേഹം പോകുന്നത്. ഫ്രീ ട്രാൻസ്ഫറിലാണ് അദ്ദേഹത്തെ റയലിന് ലഭിക്കുന്നത്.എംബപ്പേ റയലിനെ അല്ലാതെ മറ്റൊരു ടീമിനെയും ഇതുവരെ പരിഗണിച്ചിട്ടില്ല.

റയൽ മാഡ്രിഡ് ദൈനംദിനം ശക്തി വർദ്ധിപ്പിക്കുകയാണ്.ബെല്ലിങ്ങ്ഹാം,വിനീഷ്യസ് എന്നിവരെപ്പോലെ നിരവധി സൂപ്പർതാരങ്ങൾ ഉള്ള ടീമിലേക്കാണ് എംബപ്പേയും എൻഡ്രിക്കുമൊക്കെ വരുന്നത്.ഇത് അവരുടെ എതിരാളികളായ ബാഴ്സലോണക്ക് ആശങ്ക നൽകുന്ന കാര്യമാണ്. പക്ഷേ ബാഴ്സ ആരാധകനും പ്രമുഖ മാധ്യമപ്രവർത്തകനുമായ ജോട്ട ജോർഡി ഇക്കാര്യത്തിൽ ആശങ്കപ്പെടുന്നില്ല.എംബപ്പേയെ അരൗഹോയും കുബാർസിയും പൂട്ടുമെന്നാണ് ഇദ്ദേഹം ഒരു വെല്ലുവിളി രൂപേണ പറഞ്ഞിട്ടുള്ളത്.ജോട്ട ജോർഡിയുടെ വാക്കുകൾ ഇങ്ങനെയാണ്.

“എംബപ്പേ റയൽ മാഡ്രിഡിലേക്ക് വരുന്നു. എനിക്ക് അദ്ദേഹത്തോട് ഒരൊറ്റ കാര്യം മാത്രമാണ് പറയാനുള്ളത്.റൊണാൾഡ് അരൗഹോയും കുബാർസിയും ആരാണ് എന്നുള്ളത് നീ അറിയും ” ഇതാണ് വെല്ലുവിളിയായി കൊണ്ട് ജോട്ട ജോർഡി പറഞ്ഞിട്ടുള്ളത്.

എന്നാൽ ഇരുവരെയും നേരിട്ടിട്ടുള്ള താരമാണ് എംബപ്പേ. ചാമ്പ്യൻസ് ലീഗിലെ ക്വാർട്ടർ ഫൈനലിൽ ബാഴ്സയും പിഎസ്ജിയും തമ്മിലായിരുന്നു ഏറ്റുമുട്ടിയിരുന്നത്. രണ്ടാം പാദത്തിൽ ഒന്നിനെതിരെ നാല് ഗോളുകൾക്കായിരുന്നു ബാഴ്സയെ പിഎസ്ജി പരാജയപ്പെടുത്തിയത്. ആ മത്സരത്തിൽ ഇരട്ട ഗോളുകൾ നേടാൻ എംബപ്പേക്ക് സാധിച്ചിരുന്നു. മാത്രമല്ല ഇതിനു മുൻപ് ബാഴ്സക്കെതിരെ ഹാട്രിക്ക് നേടിയ താരം കൂടിയാണ് എംബപ്പേ.അത്കൊണ്ട് തന്നെ ജോട്ട ജോർഡി പറഞ്ഞതുപോലെ ബാഴ്സ ഡിഫൻസ് അത്ര വലിയ വെല്ലുവിളിയൊന്നും എംബപ്പേ ക്ക് ഉയർത്താൻ സാധ്യതയില്ല എന്ന് തന്നെയാണ് പല ആരാധകരും വിലയിരുത്തുന്നത്. ഏതായാലും എംബപ്പേ കൂടി വരുന്നതോടെ റയൽ മാഡ്രിഡ് യൂറോപ്യൻ ഫുട്ബോളിൽ കൂടുതൽ പിടിമുറുക്കുകയാണ്.