എംബപ്പേ റയലിൽ എത്തുമോ? മാഴ്‌സെലോ പറയുന്നത് ഇങ്ങനെ!

വരുന്ന സമ്മർ ട്രാൻസ്ഫർ ജാലകത്തിൽ ഏറ്റവും കൂടുതൽ ചർച്ചയാവാൻ പോകുന്നത് പിഎസ്ജിയുടെ ഫ്രഞ്ച് സൂപ്പർതാരമായ കിലിയൻ എംബപ്പേയായിരിക്കുമെന്നുള്ള കാര്യത്തിൽ സംശയമില്ല.താരം പിഎസ്ജിയിൽ തന്നെ തുടരുമോ അതല്ലെങ്കിൽ റയലിലേക്ക് ചേക്കേറുമോ എന്നുള്ളത് വലിയ ഒരു ചോദ്യചിഹ്നമാണ്.ഫ്രീ ഏജന്റാവാൻ കുറഞ്ഞ മാസങ്ങൾ മാത്രം അവശേഷിക്കെ, ഇതുവരെ തീരുമാനമെടുക്കാൻ എംബപ്പേ തയ്യാറായിട്ടില്ല.

ഏതായാലും കഴിഞ്ഞ ദിവസം നടന്ന ഒരു സ്പാനിഷ് പ്രോഗ്രാമിൽ റയലിന്റെ നായകനായ മാഴ്സലോ പങ്കെടുത്തിരുന്നു.കിലിയൻ എംബപ്പേ വരുന്ന ട്രാൻസ്ഫർ ജാലകത്തിൽ റയലിലേക്ക് എത്തുമോ എന്നുള്ള ഒരു ചോദ്യം മാഴ്സെലോയോട് ചോദിക്കപ്പെട്ടിരുന്നു.എന്നാൽ വളരെ ചെറുതും ലളിതവുമായ ഒരു മറുപടിയാണ് ബ്രസീലിയൻ താരം പറഞ്ഞിട്ടുള്ളത്.എംബപ്പെ റയലിലേക്ക് എത്തുമെന്ന് പറയാൻ മാഴ്സലോ തയ്യാറായില്ല. മറിച്ച് അദ്ദേഹം പറഞ്ഞത് ഇങ്ങനെയാണ്.

” ഞാൻ എംബപ്പെ റയൽ മാഡ്രിഡിൽ എത്തിയതായി കാണുന്നില്ല.കാരണം എനിക്ക് ഭാവി കാണാൻ കഴിയില്ലല്ലോ” ഇതായിരുന്നു മാഴ്സെലോ പറഞ്ഞത്.

നേരത്തെ പല റയൽമാഡ്രിഡ് താരങ്ങളും എംബപ്പെ റയലിലേക്ക് എത്തുമെന്നുള്ള രൂപത്തിൽ സംസാരിച്ചിരുന്നു.ടോണി ക്രൂസും ബെൻസിമയുമൊക്കെ ഇത്തരത്തിലുള്ള സൂചനകൾ നൽകിയിരുന്നു. പക്ഷേ എംബപ്പെയെ സ്വന്തമാക്കുക എന്നുള്ളത് റയലിന് എളുപ്പമുള്ള ഒരു കാര്യമായിരിക്കില്ല. താരത്തെ നിലനിർത്താനുള്ള നിരന്തര ശ്രമങ്ങളാണ് പിഎസ്ജി നടത്തിക്കൊണ്ടിരിക്കുന്നത്.50 മില്യൺ യുറോ വാർഷിക സാലറിയും 200 മില്യൺ യുറോ ലോയൽറ്റി ബോണസുമാണ് ഈയിടെ പിഎസ്ജി എംബപ്പെക്ക് ഓഫർ ചെയ്തത്. ഏതായാലും ഇനി കാര്യങ്ങൾ മുഴുവനും എംബപ്പെയുടെ കയ്യിലാണ്.