എംബപ്പേ ആകെ പേടിച്ചിരിക്കുകയാണ്: ഗൂട്ടി പറയുന്നു!

റയൽ മാഡ്രിഡിന്റെ ഫ്രഞ്ച് സൂപ്പർ താരമായ കിലിയൻ എംബപ്പേക്ക് ഇത് കഷ്ടകാലമാണ്. പ്രതീക്ഷിച്ച പോലെയുള്ള ഒരു തുടക്കം ഉണ്ടാക്കിയെടുക്കാൻ അദ്ദേഹത്തിന് കഴിഞ്ഞിട്ടില്ല. 18 മത്സരങ്ങൾ കളിച്ചപ്പോൾ കേവലം 6 ഓപ്പൺ പ്ലേ ഗോളുകൾ മാത്രമാണ് അദ്ദേഹത്തിന് നേടാൻ കഴിഞ്ഞിട്ടുള്ളത്. കഴിഞ്ഞ ലിവർപൂളിനെതിരെയുള്ള മത്സരത്തിൽ അദ്ദേഹം പാഴാക്കുകയും ചെയ്തിരുന്നു.

അതുകൊണ്ടുതന്നെ താരത്തിന് ലഭിക്കുന്ന വിമർശനങ്ങൾ ഏറെയാണ്.എംബപ്പേയുടെ പ്രകടനത്തെ കുറിച്ചുള്ള പല അഭിപ്രായങ്ങളും ഇപ്പോൾ ഫുട്ബോൾ ലോകത്തുനിന്ന് ഉയർന്നു കേൾക്കുന്നുണ്ട്. റയൽ മാഡ്രിഡ് ഇതിഹാസമായ ഗൂട്ടിയും ഇക്കാര്യത്തിൽ തന്റെ അഭിപ്രായം പങ്കുവെച്ചിട്ടുണ്ട്.എംബപ്പേ ആകെ പേടിച്ചിരിക്കുകയാണെന്നും അദ്ദേഹത്തിന് കോൺഫിഡൻസ് നഷ്ടമായി എന്നുമാണ് ഗൂട്ടി പറഞ്ഞിട്ടുള്ളത്.അദ്ദേഹത്തിന്റെ വാക്കുകൾ ഇപ്രകാരമാണ്.

” നമ്മൾ പ്രതീക്ഷിച്ച പോലെ കളിക്കാൻ എംബപ്പേക്ക് ഇതുവരെ കഴിഞ്ഞിട്ടില്ല.എംബപ്പേക്ക് എന്താണ് സംഭവിച്ചുകൊണ്ടിരിക്കുന്നത് എന്നത് നിരീക്ഷിക്കണം. അദ്ദേഹത്തിന് ആത്മവിശ്വാസം നഷ്ടമായിട്ടുണ്ട്.പേടിച്ചുകൊണ്ടാണ് കളിക്കുന്നത്. കഴിഞ്ഞ ലിവർപൂളിനെതിരെയുള്ള ആ പെനാൽറ്റി എടുക്കുന്നതിനു മുൻപ് അദ്ദേഹം ശരിക്കും പേടിച്ചിരുന്നു. അദ്ദേഹത്തിന്റെ പ്രകടനത്തിൽ അദ്ദേഹം തന്നെ ഹാപ്പിയല്ല.തീർച്ചയായും റയൽ മാഡ്രിഡിനെ പോലെയുള്ള ഒരു ക്ലബ്ബിലേക്ക് എത്തുമ്പോൾ സമ്മർദ്ദം ഉണ്ടാവുന്നത് സ്വാഭാവികമാണ്.അദ്ദേഹത്തെ ഒഴിവാക്കുന്നത് ഒരു മോശം കാര്യമായിരിക്കും.മറിച്ച് അദ്ദേഹത്തെ സംരക്ഷിക്കുകയാണ് വേണ്ടത്.വിമർശിക്കാൻ എളുപ്പമാണ്. പക്ഷേ ലോകത്തെ ഏറ്റവും മികച്ച താരങ്ങളിൽ ഒരാളാണ് എംബപ്പേ എന്ന കാര്യം നിങ്ങൾ മറക്കരുത് ” ഇതാണ് ഗൂട്ടി പറഞ്ഞിട്ടുള്ളത്.

വിനീഷ്യസ് ജൂനിയർ ഇല്ലാത്തതു കൊണ്ട് തന്നെ കഴിഞ്ഞ മത്സരത്തിൽ ഇടത് വിങ്ങിലായിരുന്നു എംബപ്പേ കളിച്ചിരുന്നത്.തന്റെ യഥാർത്ഥ പൊസിഷനിലേക്ക് തിരികെ എത്തിയിട്ടും അദ്ദേഹത്തിന് തിളങ്ങാൻ കഴിഞ്ഞിരുന്നില്ല.ഇനി റയൽ ഗെറ്റാഫെക്കെതിരെയാണ് അടുത്ത മത്സരം കളിക്കുക. ആ മത്സരത്തിൽ എംബപ്പേ ഫോം കണ്ടെത്തും എന്നാണ് പ്രതീക്ഷിക്കപ്പെടുന്നത്.