എംബപ്പേയെ റയൽ കൊണ്ടുവന്നത് നല്ല വാർത്തയല്ല:ലാപോർട്ട
ഫ്രഞ്ച് സൂപ്പർതാരമായ കിലിയൻ എംബപ്പേയെ ഫ്രീ ഏജന്റായി കൊണ്ട് സ്വന്തമാക്കാൻ സ്പാനിഷ് വമ്പൻമാരായ റയൽ മാഡ്രിഡിന് കഴിഞ്ഞിരുന്നു. ഏറെ കാലമായി അവർ നടത്തുന്ന ശ്രമം ഇപ്പോഴാണ് ഫലം കണ്ടത്.എംബപ്പേയുടെ വരവ് റയൽ മാഡ്രിഡിന്റെ കരുത്ത് ഇരട്ടിയായി വർദ്ധിപ്പിക്കും എന്ന കാര്യത്തിൽ സംശയങ്ങൾ ഒന്നുമില്ല.റയലിന്റെ താര സമ്പന്നമായ നിര ഏത് വമ്പൻ ടീമിനെയും ഭയപ്പെടുത്തുന്ന ഒന്നാണ്.
എംബപ്പേയുടെ വരവ് ഏറ്റവും കൂടുതൽ തിരിച്ചടിയാവുക സ്പാനിഷ് വമ്പൻമാരായ ബാഴ്സലോണക്ക് തന്നെയാകും.ലാലിഗയിൽ റയൽ മാഡ്രിഡിനെ മറികടക്കണമെങ്കിൽ അവർക്ക് നന്നായി കഷ്ടപ്പെടേണ്ടി വരും. ഒരുപ ബാഴ്സ ആരാധകൻ എന്ന നിലയിൽ എംബപ്പേയുടെ റയലിലേക്കുള്ള വരവ് നല്ല വാർത്തയല്ല എന്നാണ് ബാഴ്സ പ്രസിഡണ്ടായ ലാപോർട്ട പറഞ്ഞിട്ടുള്ളത്. എന്നാൽ ബാഴ്സക്ക് ലാ മാസിയയും തങ്ങളുടെ ഫിലോസഫിയും ഉണ്ടെന്ന് ഇദ്ദേഹം കൂട്ടിച്ചേർത്തിട്ടുണ്ട്.ലാപോർട്ടയുടെ വാക്കുകൾ ഇങ്ങനെയാണ്.
“ഒരു ബാഴ്സ ആരാധകൻ എന്ന നിലയിൽ ഇതൊരു നല്ല വാർത്തയല്ല. പക്ഷേ ഞങ്ങൾക്ക് ചാമ്പ്യൻസ് ലീഗ് കിരീടം നേടണം.ബാസ്ക്കറ്റ്ബോൾ ഫൈനലിൽ പ്രവേശിക്കണം. പക്ഷേ എംബപ്പേയെ പോലെയുള്ള താരങ്ങളെ കൊണ്ടുവരുന്നതിനേക്കാൾ എനിക്കിഷ്ടം ലാ മാസിയയിലൂടെ ഞങ്ങൾ സ്വന്തമായി താരങ്ങളെ വളർത്തിയെടുത്ത് ഞങ്ങളുടെ ഫിലോസഫിയുമായി മുന്നോട്ടു പോകുന്നതാണ്.ഞങ്ങളുടെ എതിരാളികൾ ചെയ്തതിനെ തീർച്ചയായും ഞാൻ ബഹുമാനിക്കുന്നു. പക്ഷേ ഞാൻ എന്റെ ഫിലോസഫിയിൽ തന്നെ ഉറച്ചുനിൽക്കുന്നു “ഇതാണ് ബാഴ്സലോണ പ്രസിഡന്റ് പറഞ്ഞിട്ടുള്ളത്.
ബാഴ്സ അവസാനമായി ചാമ്പ്യൻസ് ലീഗ് കിരീടം നേടിയിട്ട് ഇപ്പോൾ പത്ത് വർഷത്തോളം പൂർത്തിയാവാനായി.ബാഴ്സയെ സംബന്ധിച്ചിടത്തോളം ഇതൊരു മോശം സമയം കൂടിയാണ്. നിലവിൽ പുതിയ പരിശീലകനായി കൊണ്ട് ഹാൻസി ഫ്ലിക്കിനെ അവർ നിയമിച്ചിട്ടുണ്ട്. അദ്ദേഹം ബാഴ്സയെ പഴയ പ്രതാപത്തിലേക്ക് കൊണ്ടുവരുമെന്നാണ് ചില ആരാധകരെങ്കിലും വിശ്വസിക്കുന്നത്.
