എംബപ്പേയെ കിട്ടിയില്ല, റയലിനെ ട്രോളി ജെറാർഡ് പീക്കെ!

ഈ ട്രാൻസ്ഫർ ജാലകത്തിൽ റയൽ ടീമിലേക്ക് എത്തിക്കാൻ കിണഞ്ഞു പരിശ്രമിച്ച താരമാണ് കിലിയൻ എംബപ്പേ. താരത്തിന് വേണ്ടി ഒരുപറ്റം ഓഫറുകൾ റയൽ പിഎസ്ജിക്ക്‌ നൽകിയിരുന്നു. ഒടുവിലെ റിപ്പോർട്ടുകൾ പ്രകാരം 200 മില്യൺ യൂറോ വരെ റയൽ പിഎസ്ജിക്ക്‌ വാഗ്ദാനം ചെയ്തിരുന്നു. എന്നാൽ പിഎസ്ജി താരത്തെ വിട്ടു നൽകാൻ ഒരുക്കമായിരുന്നില്ല. ഒടുവിൽ റയലിന് എംബപ്പേയെ ലഭിക്കാതെ പോവുകയായിരുന്നു. ട്രാൻസ്ഫർ ജാലകം അടച്ചതോടെ താരം ഈ സീസണിൽ പിഎസ്ജിയിൽ തന്നെ തുടരുമെന്നുള്ളത് ഉറപ്പായി കഴിഞ്ഞു.

അതേസമയം ഈ വിഷയത്തിൽ റയലിനെ ട്രോളി കൊണ്ട് രംഗത്ത് വന്നിരിക്കുകയാണ് ബാഴ്‌സ സൂപ്പർ താരമായ ജെറാർഡ് പീക്കെ.തന്റെ ട്വിറ്റെറിലൂടെയാണ് ബാഴ്‌സയുടെ നായകൻമാരിൽ ഒരാളായ പീക്കെ റയലിനെ പരിഹസിച്ചത്.എംബപ്പേയുടെ ട്രാൻസ്ഫർ റൂമറുമായി ബന്ധപ്പെട്ട് മുമ്പ് സ്പാനിഷ് മാധ്യമമായ മാർക്ക ഒരു റിപ്പോർട്ട്‌ പുറത്ത് വിട്ടിരുന്നു. എംബപ്പേ റയലിൽ ഏത് ജേഴ്സി അണിയും എന്നായിരുന്നു ആ റിപ്പോർട്ടിലെ ചർച്ചാവിഷയം.ആ ഒരു ലേഖനത്തിന്റെ സ്ക്രീൻഷോട്ട് പങ്കുവെച്ച് കൊണ്ട് പീക്കെ ക്യാപ്ഷൻ നൽകിയത് ” നമ്പർ 7 ” എന്നായിരുന്നു. അതായത് പിഎസ്ജിയിൽ എംബപ്പേ ഇപ്പോഴും അണിഞ്ഞു കൊണ്ടിരിക്കുന്ന ജേഴ്സി നമ്പർ ഏഴാണ്. ചുരുക്കത്തിൽ എംബപ്പേയെ എത്തിക്കാൻ റയലിന് കഴിയാത്തതിനെയാണ് പീക്കെ ഇത് വഴി പരിഹസിച്ചത്.

ഏതായാലും ഈ സീസൺ അവസാനിച്ചാൽ എംബപ്പേയുടെ പിഎസ്ജിയുമായുള്ള കരാർ അവസാനിക്കും. താരം പിഎസ്ജിയുമായി കരാർ പുതുക്കുമോ അതോ ഫ്രീയായി കൊണ്ട് റയലിലേക്ക് എത്തുമോ എന്നാണ് ഇനി അറിയാനുള്ളത്.