ആ സംഭവമെന്നെ വല്ലാതെ അത്ഭുതപ്പെടുത്തി കളഞ്ഞു, ക്രിസ്റ്റ്യാനോയെ കുറിച്ച് ഡിമരിയ പറയുന്നു!

സൂപ്പർ താരം ക്രിസ്റ്റ്യാനോ റൊണാൾഡോക്കൊപ്പം കളിക്കാൻ അവസരം ലഭിച്ചിട്ടുള്ള താരമാണ് എയ്ഞ്ചൽ ഡി മരിയ.2010 മുതൽ 2014 വരെയാണ് ഇരുവരും റയലിൽ ഒരുമിച്ച് കളിച്ചിട്ടുള്ളത്. ഏതായാലും ആ കാലയളവിൽ ക്രിസ്റ്റ്യാനോ തന്നെ അത്ഭുതപ്പെടുത്തിയ ഒരു സംഭവം പങ്കു വെച്ചിരിക്കുകയാണിപ്പോൾ ഡി മരിയ. തന്റെ ബർത്ത് ഡേ പാർട്ടിക്ക്‌ ക്രിസ്റ്റ്യാനോയെ ക്ഷണിക്കുകയും അദ്ദേഹം വരില്ലെന്ന് താൻ വിചാരിച്ചിരിക്കുന്ന സമയത്ത് അദ്ദേഹം കടന്ന് വന്നത് തന്നെ അത്ഭുതപ്പെടുത്തി കളഞ്ഞു എന്നുമാണ് ഡി മരിയ അറിയിച്ചിട്ടുള്ളത്. കളത്തിനകത്തും പുറത്തും ക്രിസ്റ്റ്യാനോ വ്യത്യസ്ഥനായ വ്യക്തിയാണെന്നും ഡി മരിയ കൂട്ടിച്ചേർത്തു. അദ്ദേഹത്തിന്റെ വാക്കുകൾ ടിവൈസി സ്‌പോർട്സ്‌ റിപ്പോർട്ട്‌ ചെയ്തിരിക്കുന്നത് ഇങ്ങനെയാണ്.

“ഞാൻ റയലിൽ എത്തിയതിന് ശേഷമുള്ള എന്റെ ആദ്യത്തെ ബർത്ത് ഡേയായിരുന്നു.എന്റെ കുറച്ചു ഫ്രണ്ട്സുകൾക്ക്‌ പുറമേ ഞാൻ ക്രിസ്റ്റ്യാനോയെയും ക്ഷണിച്ചു. കൂടാതെ സുഹൃത്തുക്കളായ പെപെ, മാഴ്‌സെലോ എന്നിവരെയും ക്ഷണിച്ചിരുന്നു.ഞാൻ കരുതിയിരുന്നത് ക്രിസ്റ്റ്യാനോ വരില്ല എന്നായിരുന്നു.പക്ഷേ അന്നേ ദിവസം അദ്ദേഹം താൻ വരുന്ന കാര്യം മെസ്സേജ് അയച്ചു.അദ്ദേഹം വീട്ടിലേക്ക് വരികയും ഞങ്ങൾ ഒരുമിച്ചിരുന്ന് ബർത്ത് ഡേ ആഘോഷിക്കുകയും ചെയ്തു. യഥാർത്ഥത്തിലെ ഞാൻ അപ്പോൾ വല്ലാതെ അത്ഭുതപ്പെട്ടു പോയി. കളത്തിനകത്ത് ക്രിസ്റ്റ്യാനോ എല്ലാം സ്വന്തമാക്കാൻ ആഗ്രഹിക്കുന്ന ഒരു വ്യക്തിയാണ്. കളത്തിന് പുറത്ത് അദ്ദേഹം വ്യത്യസ്ഥനായ ഒരു വ്യക്തിയുമാണ് ” ഇതാണ് ഡി മരിയ റൊണാൾഡോയെ കുറിച്ച് പറഞ്ഞത്.

നിലവിൽ ഡി മരിയ പിഎസ്ജിയുടെ താരമാണ്. അതേസമയം റൊണാൾഡോ മാഞ്ചസ്റ്റർ യുണൈറ്റഡിലേക്ക് തിരികെ എത്തുകയും ചെയ്തിരുന്നു.