ആ രണ്ട് സൂപ്പർ താരങ്ങൾ ബാഴ്സക്ക് യോജിക്കില്ലെന്ന് സാവി

ഫുട്ബോൾ ലോകത്തെ രണ്ട് മികച്ച സ്ട്രൈക്കെർമാരാണ് ആഴ്‌സണലിന്റെ ഒബമയാങും ലിവർപൂളിന്റെ സാഡിയോ മാനേയും. ഇരുവരെയും ചുറ്റിപറ്റിയും ബാഴ്സയെ ബന്ധപ്പെടുത്തിയും കൊണ്ടുള്ള ഒട്ടേറെ ട്രാൻസ്ഫർ അഭ്യൂഹങ്ങൾ ഈയിടെ സജീവമായിരുന്നു. എന്നാൽ ഈ രണ്ട് താരങ്ങളും ബാഴ്സക്ക് യോജിച്ച താരങ്ങൾ അല്ലെന്നും ഇരുവരെയും ബാഴ്സക്ക് ആവശ്യമില്ലെന്നും അഭിപ്രായപ്പെട്ട് കൊണ്ട് രംഗത്ത് വന്നിരിക്കുകയാണ് മുൻ ബാഴ്സ ഇതിഹാസവും നിലവിലെ അൽ-സാദ് പരിശീലകനുമായ സാവി. കഴിഞ്ഞ ദിവസം തന്റെ മുൻ സഹതാരമായ സാമുവൽ ഏറ്റൂവുമായുള്ള ഇൻസ്റ്റാഗ്രാം ചാറ്റിലാണ് താരം ഇക്കാര്യം വെളിപ്പെടുത്തിയത്. ഇരുവരും ബാഴ്സക്ക് യോജിച്ച താരങ്ങളാണ് എന്ന് താൻ കരുതുന്നില്ലെന്നും അത്തരം താരങ്ങളെ കണ്ടെത്താൻ പ്രയാസമാണ് എന്നുമായിരുന്നു അദ്ദേഹത്തിന്റെ അഭിപ്രായം.

” മാനേയും ഒബമയാങും ഓപ്പൺ സ്പേസിൽ മികവ് പുലർത്തുന്ന താരങ്ങളാണ്. പക്ഷെ ബാഴ്‌സലോണയ്ക്ക് ഇപ്പോൾ ആവിശ്യം ചെറിയ സ്‌പേസുകളിൽ മികവ് പുലർത്തുന്ന താരങ്ങളെയാണ്. അത്കൊണ്ട് തന്നെ ഈ രണ്ട് താരങ്ങൾ ബാഴ്സക്ക് യോജിച്ചതല്ല എന്നാണ് എന്റെ അഭിപ്രായം. അത്തരം താരങ്ങളെ കണ്ടെത്തുക എന്നതും പ്രയാസമേറിയ ഒന്നാണ്. നിലവിൽ ലൂയിസ് സുവാരസിനെ പോലെയും മുൻപ് സാമുവൽ ഏറ്റൂവിനെ പോലെയുമുള്ള താരങ്ങളെയാണ് ബാഴ്സക്ക് ആവിശ്യം ” സാവി പറഞ്ഞു.