ആവറേജ് ടീമുകളെയാണ് ഞങ്ങൾ തോൽപ്പിക്കുന്നത് എന്ന് പറഞ്ഞവർക്കുള്ള മറുപടിയാണ് ഇത്:യമാൽ

ഇന്നലെ ലാലിഗയിൽ നടന്ന എൽ ക്ലാസിക്കോ പോരാട്ടത്തിൽ വലിയ വിജയമാണ് ബാഴ്സ നേടിയിട്ടുള്ളത്. എതിരില്ലാത്ത നാല് ഗോളുകൾക്കാണ് ചിരവൈരികളായ റയൽ മാഡ്രിഡിനെ അവർ പരാജയപ്പെടുത്തിയിട്ടുള്ളത്.സാന്റിയാഗോ ബെർണാബുവിൽ വെച്ച് നടന്ന മത്സരത്തിൽ ലെവന്റോസ്ക്കി ഇരട്ട ഗോളുകൾ നേടുകയായിരുന്നു.റാഫിഞ്ഞ,യമാൽ എന്നിവർ ഓരോ ഗോളുകൾ വീതം നേടി.

മത്സരശേഷം ചില കാര്യങ്ങൾ യമാൽ പറഞ്ഞിട്ടുണ്ട്. ഇപ്പോൾ ലോകത്തെ ഏറ്റവും മികച്ച ടീം ബാഴ്സയാണ് എന്നാണ് അദ്ദേഹം പറഞ്ഞിട്ടുള്ളത്. ആവറേജ് ടീമുകളെയാണ് ഞങ്ങൾ തോൽപ്പിക്കുന്നത് എന്ന് പറഞ്ഞവർക്കുള്ള മറുപടിയാണ് ഈ വിജയമെന്നും യമാൽ പറഞ്ഞിട്ടുണ്ട്.അദ്ദേഹത്തിന്റെ വാക്കുകൾ ഇങ്ങനെയാണ്.

” ലാലിഗയിൽ ഞങ്ങൾ തോൽപ്പിക്കുന്നത് ആവറേജ് ടീമുകളെയാണ് എന്നാണ് പലരും പറഞ്ഞിരുന്നത്.ഞങ്ങൾക്ക് വലിയ മത്സരങ്ങൾ വന്നിട്ടില്ല എന്നും അവർ ആരോപിച്ചു. എന്നാൽ ഇപ്പോൾ ഞങ്ങൾ റയൽ മാഡ്രിഡിനെ എതിരില്ലാത്ത നാല് ഗോളുകൾക്ക് അവരുടെ മൈതാനത്ത് തോൽപ്പിച്ചു. ആരെ തോൽപ്പിക്കാനും ഞങ്ങൾക്ക് ഇപ്പോൾ സാധിക്കും “ഇതാണ് 17 കാരനായ താരം പറഞ്ഞിട്ടുള്ളത്.

ഏതായാലും ബാഴ്സ തകർപ്പൻ ഫോമിലാണ് ഇപ്പോൾ കളിച്ചുകൊണ്ടിരിക്കുന്നത്.ബയേണിനെ തോൽപ്പിച്ചതിന് പിന്നാലെയാണ് റയലിനെ അവർ തോൽപ്പിച്ചത്.ഒരു വലിയ മാറ്റം തന്നെയാണ് അവർക്ക് ഈ സീസണിൽ സംഭവിച്ചിട്ടുള്ളത്.