സൗത്ത് കൊറിയയെ അരിഞ്ഞുവീഴ്ത്തി,ബ്രസീൽ രാജകീയമായി ക്വാർട്ടറിൽ!

ഖത്തർ വേൾഡ് കപ്പിൽ ഇപ്പോൾ നടന്ന പ്രീ ക്വാർട്ടർ പോരാട്ടത്തിൽ ബ്രസീലിന് വിജയം. ഒന്നിനെതിരെ നാലു ഗോളുകൾക്കാണ് ബ്രസീൽ സൗത്ത് കൊറിയയെ പരാജയപ്പെടുത്തിയത്. ആരാധകരുടെ മനം നിറച്ച പ്രകടനമാണ് ബ്രസീൽ മത്സരത്തിൽ പുറത്തെടുത്തത്.

ഇതോടെ ബ്രസീൽ രാജകീയമായി ക്വാർട്ടർ ഫൈനലിലേക്ക് പ്രവേശിച്ചിട്ടുണ്ട്. യൂറോപ്പ്യൻ ടീമായ ക്രൊയേഷ്യയാണ് ബ്രസീലിന്റെ എതിരാളികൾ.സൗത്ത് കൊറിയക്കെതിരെ മിന്നുന്ന പ്രകടനമാണ് ബ്രസീൽ പുറത്തെടുത്തത്.ആദ്യ പകുതിയിൽ തന്നെ നാല് ഗോളുകൾ നേടിക്കൊണ്ട് ബ്രസീൽ വിജയം ഉറപ്പിക്കുകയായിരുന്നു.

മത്സരത്തിന്റെ ഏഴാം മിനുട്ടിൽ വിനീഷ്യസ് ജൂനിയറുടെ ഗോൾ വന്നത്. ബോക്സിലേക്ക് വന്ന ബോൾ വിനീഷ്യസ് ജൂനിയർ ഒരു പിഴവും കൂടാതെ ഫിനിഷ് ചെയ്യുകയായിരുന്നു. പിന്നീട് പതിമൂന്നാം മിനിട്ടിൽ ലഭിച്ച പെനാൽറ്റി നെയ്മർ ജൂനിയർ ഗോളാക്കി മാറ്റി.29ആം മിനിട്ടിലാണ് റിച്ചാർലീസണിന്റെ ഗോൾ വന്നത്.സിൽവ നീട്ടി നൽകിയ ബോൾ താരം ഒരു പിഴവും കൂടാതെ വലയിൽ എത്തിക്കുകയായിരുന്നു.

36ആം മിനുട്ടിൽ വിനീഷ്യസിന്റെ ക്രോസിൽ നിന്ന് പക്കേറ്റ കൂടി ഗോൾ നേടിയതോടെ ബ്രസീലിന്റെ ഗോൾ പട്ടിക പൂർത്തിയാവുകയായിരുന്നു.രണ്ടാം പകുതിയിൽ കൂടുതൽ ഗോളുകൾ നേടാനുള്ള അവസരങ്ങൾ ലഭിച്ചുവെങ്കിലും മുതലെടുക്കാൻ ബ്രസീലിന് കഴിഞ്ഞില്ല. അതേസമയം 76 ആം മിനുട്ടിൽ പൈക്ക് സൗത്ത് കൊറിയയുടെ ആശ്വാസഗോൾ കണ്ടെത്തി.