സ്പെയിനിന്റെ വിജയ രഹസ്യമെന്ത്? കുക്കുറെല്ല പറയുന്നു!
ഈ യൂറോ കപ്പിൽ തകർപ്പൻ പ്രകടനമാണ് വമ്പൻമാരായ സ്പെയിൻ നടത്തിക്കൊണ്ടിരിക്കുന്നത്.യൂറോയിൽ കളിച്ച എല്ലാ മത്സരങ്ങളിലും വിജയിച്ച ടീം സ്പെയിനാണ്. കഴിഞ്ഞ ക്വാർട്ടർ ഫൈനൽ പോരാട്ടത്തിൽ ജർമ്മനിയെ തോൽപ്പിച്ചു കൊണ്ടാണ് സ്പെയിൻ സെമിയിൽ പ്രവേശിച്ചത്. നിലവിൽ ഏറ്റവും കൂടുതൽ കിരീട സാധ്യത കൽപ്പിക്കപ്പെടുന്നതും ഈ സ്പാനിഷ് ടീമിന് തന്നെയാണ്.
യൂറോ കപ്പിന് മുന്നേ സ്പെയിനിന് വലിയ സാധ്യതകൾ ഒന്നും തന്നെ കൽപ്പിക്കപ്പെട്ടിട്ടുണ്ടായിരുന്നില്ല. അത് തങ്ങൾക്ക് ഏറെ ഗുണകരമായി എന്ന് സ്പാനിഷ് സൂപ്പർതാരമായ കുക്കുറെല്ല ഇപ്പോൾ അവകാശപ്പെട്ടിട്ടുണ്ട്. അതുകൊണ്ടുതന്നെ സമ്മർദ്ദം ഇല്ലാതെ കളിക്കാൻ കഴിഞ്ഞതാണ് തങ്ങളുടെ വിജയ രഹസ്യമെന്നും അദ്ദേഹം വ്യക്തമാക്കിയിട്ടുണ്ട്.കുക്കുറെല്ലയുടെ വാക്കുകൾ ഇങ്ങനെയാണ്.
” ഒരുപാട് കാലമായി ബഹുമാനം ലഭിച്ചുകൊണ്ടിരിക്കുന്ന ടീമാണ് സ്പെയിൻ. പക്ഷേ ഈ യൂറോ കപ്പിലേക്ക് വരുമ്പോൾ അങ്ങനെയല്ലായിരുന്നു.പുറത്തുള്ളവർ ഞങ്ങളെ സഹായിച്ചു എന്നാണ് ഞാൻ കരുതുന്നത്. ഒന്നും തന്നെ നഷ്ടപ്പെടാനില്ല എന്ന ആത്മവിശ്വാസത്തോടെ കൂടിയാണ് ഞങ്ങൾ ഈ ടൂർണമെന്റ് ആരംഭിച്ചത്.ഇപ്പോൾ ഞങ്ങളുടെ ആ ആത്മവിശ്വാസം വർദ്ധിച്ചു.ടൂർണ്ണമെന്റിലെ ഏറ്റവും പ്രധാനപ്പെട്ട നിമിഷത്തിലാണ് ഞങ്ങൾ ഇപ്പോൾ ഉള്ളത്. ഞങ്ങൾക്ക് ഒരു മികച്ച ടീം ഉണ്ടെന്ന് എനിക്കറിയാമായിരുന്നു. ഞങ്ങൾ അത് തെളിയിച്ചു കഴിഞ്ഞതാണ്. ഇനി രണ്ട് സ്റ്റെപ്പ് കൂടിയാണ് ഞങ്ങൾക്ക് ബാക്കിയുള്ളത് ” ഇതാണ് കുക്കുറെല്ല പറഞ്ഞിട്ടുള്ളത്.
സെമി ഫൈനൽ പോരാട്ടത്തിൽ കരുത്തരായ ഫ്രാൻസാണ് സ്പെയിനിന്റെ എതിരാളികൾ. നിലവിലെ പ്രകടനം വെച്ച് നോക്കുമ്പോൾ സ്പെയിനിനാണ് മുൻതൂക്കം.ജർമ്മനിയെ പരാജയപ്പെടുത്താൻ അവർക്ക് കഴിഞ്ഞിരുന്നു. അതേസമയം പോർച്ചുഗലിനെ തോൽപ്പിച്ചു കൊണ്ടാണ് ഫ്രാൻസ് കടന്നുവരുന്നത്. താരസമ്പന്നമായ ഫ്രഞ്ച് നിരയെ ഒരിക്കലും എഴുതിത്തള്ളാൻ കഴിയില്ല.
