സെൽഫ് ഗോൾ വിനയായി, ഫ്രാൻസിന് മുന്നിൽ തലതാഴ്ത്തി ജർമ്മനി!

യൂറോ കപ്പിലെ വമ്പൻമാർ തമ്മിൽ കൊമ്പുകോർത്ത മത്സരത്തിൽ ഫ്രാൻസിന് വിജയം. എതിരില്ലാത്ത ഒരു ഗോളിനാണ് ഫ്രഞ്ചുപട ജർമ്മനിയെ കീഴടക്കിയത്. ജർമ്മൻ താരം മാറ്റ്സ് ഹമ്മൽസ് വഴങ്ങിയ സെൽഫ് ഗോളാണ് ജർമ്മനിക്ക് വിനയായത്.മത്സരത്തിൽ ഇരുടീമുകളും തുല്യപോരാട്ടമാണ് കാഴ്ച്ചവെച്ചത്. ലഭിച്ച അവസരങ്ങൾ മുതലെടുക്കുന്നതിൽ ഇരുടീമുകളും പരാജയപ്പെടുകയായിരുന്നു. ജയത്തോടെ ഗ്രൂപ്പിൽ രണ്ടാം സ്ഥാനത്താണ് ഫ്രാൻസ്. പോർച്ചുഗല്ലാണ് ഒന്നാമത്.

ഗ്രീസ്‌മാൻ-ബെൻസിമ-എംബപ്പേ എന്നിവരാണ് ഫ്രാൻസിന്റെ മുന്നേറ്റനിരയെ നയിച്ചതെങ്കിൽ ഗ്നാബ്രി-ഹാവേർട്സ്-മുള്ളർ എന്നിവർക്കായിരുന്നു ജർമ്മനിയുടെ ആക്രമണചുമതല.മത്സരത്തിന്റെ 20-ആം മിനുട്ടിലാണ് ഹമ്മൽസ് സെൽഫ് ഗോൾ വഴങ്ങുന്നത്.ഹെർണാണ്ടസിന്റെ ഗോൾ ശ്രമം തടയുന്നതിനിടെയാണ് ഹമ്മൽസ് സെൽഫ് ഗോൾ വഴങ്ങിയത്. പിന്നീട് തിരിച്ചടിക്കാനുള്ള ശ്രമങ്ങൾ ജർമ്മനി നടത്തി. ബെൻസിമയും എംബപ്പേയും ഓരോ തവണ വലകുലുക്കിയെങ്കിലും അതെല്ലാം ഓഫ്‌സൈഡ് വിധിക്കുകയായിരുന്നു. എന്നിരുന്നാലും മൂന്ന് പോയിന്റുകൾ സ്വന്തമാക്കി കൊണ്ടാണ് ഫ്രാൻസ് കളം വിട്ടത്.