വേൾഡ് കപ്പ് ടീമിലെടുത്തത് കാമുകിയെ പ്രൊപോസ് ചെയ്ത് ആഘോഷിച്ച് ബ്രസീൽ താരം!

ഇന്നലെയായിരുന്നു ബ്രസീലിന്റെ പരിശീലകനായ ടിറ്റെ വരുന്ന ഖത്തർ വേൾഡ് കപ്പിനുള്ള ബ്രസീൽ സ്‌ക്വാഡ് പ്രഖ്യാപിച്ചത്. പരമാവധി ഉൾപ്പെടുത്താവുന്ന 26 പേരെ ഉൾപ്പെടുത്തിക്കൊണ്ടുള്ള ടീമായിരുന്നു ഇത്. പ്രതീക്ഷിച്ച സൂപ്പർതാരങ്ങളെല്ലാം ടീമിൽ ഇടം നേടിയിട്ടുണ്ട്.ഫിർമിനോയുടെ കാര്യത്തിൽ മാത്രമാണ് വ്യത്യാസം സംഭവിച്ചത്.

അതേസമയം ഫ്ലെമെങ്കോയുടെ സൂപ്പർ സ്ട്രൈക്കറായ പെഡ്രോക്ക് ബ്രസീലിന്റെ ടീമിൽ ഇടം ലഭിച്ചിരുന്നു. താരത്തിന്റെ ആദ്യത്തെ വേൾഡ് കപ്പ് ആണിത്. ഈ സീസണിലെ ബ്രസീലിയൻ ലീഗിലും കോപ ലിബർട്ടഡോറസിലും തകർപ്പൻ പ്രകടനം പുറത്തെടുക്കാൻ പെഡ്രോക്ക് സാധിച്ചിരുന്നു. അതിന്റെ ഫലമായി കൊണ്ടാണ് താരത്തിന് സ്ഥാനം ലഭിച്ചിട്ടുള്ളത്.

ബ്രസീലിയൻ ടീമിൽ ഇടം ലഭിച്ചത് ആഘോഷിക്കുന്ന പെഡ്രോയുടെയും കുടുംബാംഗങ്ങളുടെയും വീഡിയോ ബ്രസീലിയൻ മാധ്യമങ്ങൾ പുറത്തുവിട്ടിരുന്നു. വളരെയധികം സന്തോഷപൂർവ്വമായിരുന്നു ഇവർ ഈ പ്രഖ്യാപനത്തെ വരവേറ്റിരുന്നത്. എന്നാൽ ഈ ആഘോഷത്തിന്റെ ഭാഗമായി മറ്റൊരു കാര്യം കൂടി പെഡ്രോ ചെയ്തിരുന്നു.തന്റെ കാമുകിയെ അദ്ദേഹം പ്രൊപ്പോസ് ചെയ്യുകയായിരുന്നു.തുടർന്ന് കാമുകി സമ്മതം അറിയിക്കുകയും പെഡ്രോ മോതിരം വിരലിൽ അണിയിപ്പിക്കുകയും ചെയ്തു. ഇതിന്റെ ദൃശ്യങ്ങൾ ഇപ്പോൾ സാമൂഹിക മാധ്യമങ്ങളിൽ ലഭ്യമാണ്.

മാത്രമല്ല മറ്റു പല താരങ്ങളും തങ്ങളുടെ സന്തോഷങ്ങൾ പ്രകടിപ്പിക്കുന്നതിന്റെ ദൃശ്യങ്ങൾ ഇപ്പോൾ പുറത്തേക്ക് വന്നിട്ടുണ്ട്. നെയ്മർ ജൂനിയർ,റിച്ചാർലീസൺ,ആന്റണി തുടങ്ങിയവരൊക്കെ വളരെ സന്തോഷപൂർവ്വമാണ് ഈ പ്രഖ്യാപനത്തെ വരവേറ്റിട്ടുള്ളത്.ഏതായാലും വളരെ ശക്തമായ ഒരു ടീം തന്നെയാണ് ബ്രസീൽ പ്രഖ്യാപിച്ചിട്ടുള്ളത്. ചെറിയ ഒരു ദൗർബല്യം എന്ന് പറയാനുള്ളത് ബ്രസീലിന്റെ ഡിഫൻസിൽ മാത്രമാണ്.