വേൾഡ് കപ്പിൽ ഫൈനലിൽ ബ്രസീലിനെതിരെ കളിക്കുന്നത് സ്വപ്നമാണ് : ക്രിസ്റ്റ്യാനോ റൊണാൾഡോ

ഖത്തർ വേൾഡ് കപ്പിന് ഇനി വിരലിൽ എണ്ണാവുന്ന ദിവസങ്ങൾ മാത്രമാണ് അവശേഷിക്കുന്നത്.ഫുട്ബോൾ ലോകത്തെ സൂപ്പർതാരങ്ങൾ എല്ലാവരും വളരെയധികം ആവേശഭരിതരാണ്. ലയണൽ മെസ്സിയും നെയ്മർ ജൂനിയറുമൊക്കെ വേൾഡ് കപ്പിനെ കുറിച്ചുള്ള തങ്ങളുടെ അഭിപ്രായങ്ങൾ പങ്കുവെച്ചിരുന്നു. ഇപ്പോഴിതാ സൂപ്പർ താരം ക്രിസ്റ്റ്യാനോ റൊണാൾഡോയും വേൾഡ് കപ്പിന് കുറിച്ചുള്ള ചില പ്രതീക്ഷകൾ പങ്കുവെച്ചിട്ടുണ്ട്.

വേൾഡ് കപ്പ് ഫൈനലിൽ ബ്രസീലിനെതിരെ കളിക്കുക എന്നുള്ളത് തന്റെ ഒരു സ്വപ്നമാണ് എന്നാണ് ക്രിസ്റ്റ്യാനോ റൊണാൾഡോ പറഞ്ഞിട്ടുള്ളത്. തന്റെ സഹതാരമായ കാസമിറോയോട് ഇക്കാര്യത്തെക്കുറിച്ച് തമാശരൂപേണ സംസാരിച്ചിരുന്നുവെന്നും റൊണാൾഡോ കൂട്ടിച്ചേർത്തു.ലൈവ്സ്കോറിനോട് സംസാരിക്കുകയായിരുന്നു താരം.റൊണാൾഡോയുടെ വാക്കുകൾ ഇങ്ങനെയാണ്.

” വേൾഡ് കപ്പിന്റെ ഫൈനലിൽ ബ്രസീലും പോർച്ചുഗലും തമ്മിൽ ഏറ്റുമുട്ടും എന്നുള്ള കാര്യം തമാശരൂപേണ ഞാൻ കാസമിറോയോട് പറഞ്ഞിരുന്നു. സത്യം പറഞ്ഞാൽ ബ്രസീലിനെതിരെ ഫൈനൽ കളിക്കുക എന്നുള്ളത് ഒരു സ്വപ്നമാണ്. ലോകത്തിലെ ഏറ്റവും ബുദ്ധിമുട്ടേറിയ കോമ്പറ്റീഷൻ ആണ് വേൾഡ് കപ്പ്. പക്ഷേ ആ കിരീടം ഞാൻ സ്വപ്നം കാണുന്നുണ്ട്. അത് ബുദ്ധിമുട്ടാണ് എന്നറിയാം. പക്ഷേ സ്വപ്നം കാണുന്നതിന് ചിലവൊന്നുമില്ലല്ലോ, അതുകൊണ്ട് ഞാൻ എപ്പോഴും സ്വപ്നം കാണാറുണ്ട് ” ഇതാണ് റൊണാൾഡോ പറഞ്ഞിട്ടുള്ളത്.

ഖത്തർ വേൾഡ് കപ്പിലെ പ്രധാനപ്പെട്ട കിരീട ഫേവറേറ്റുകളാണ് ബ്രസീൽ. അതേസമയം പോർച്ചുഗലിനെ സംബന്ധിച്ചിടത്തോളം പ്ലേ ഓഫ് കളിച്ചുകൊണ്ടാണ് അവർ വേൾഡ് കപ്പിന് യോഗ്യത നേടിയത്. എന്നാൽ ശക്തമായ ഒരു സ്‌ക്വാഡ് തന്നെ പോർച്ചുഗല്ലിനുണ്ട്.