വേറെ ഏതെങ്കിലും താരമായിരുന്നുവെങ്കിൽ നിങ്ങൾ പൊലിപ്പിച്ച് വിട്ടേനെ: സ്പാനിഷ് സൂപ്പർതാരത്തെക്കുറിച്ച് പരിശീലകൻ!
ഇന്നലെ യൂറോ കപ്പിൽ നടന്ന തങ്ങളുടെ ആദ്യ മത്സരത്തിൽ ഗംഭീര വിജയമാണ് വമ്പൻമാരായ സ്പെയിൻ സ്വന്തമാക്കിയത്. എതിരില്ലാത്ത മൂന്ന് ഗോളുകൾക്കാണ് അവർ ലൂക്ക മോഡ്രിച്ചിന്റെ ക്രൊയേഷ്യയെ പരാജയപ്പെടുത്തിയത്. ഒരു ഗോളും ഒരു അസിസ്റ്റും നേടി കൊണ്ട് മത്സരത്തിൽ തിളങ്ങിയത് ഫാബിയാൻ റൂയിസാണ്.കാർവഹൽ,മൊറാറ്റ എന്നിവർ ഓരോ ഗോളുകൾ വീതം നേടിയപ്പോൾ പെഡ്രി,യമാൽ എന്നിവർ ഓരോ അസിസ്റ്റുകളും സ്വന്തമാക്കുകയായിരുന്നു.
മത്സരത്തിൽ ഫാബിയാൻ റൂയിസ് നേടിയ ഗോളും അസിസ്റ്റും അതിഗംഭീരമായിരുന്നു.പിഎസ്ജി താരമായ റൂയിസ് തന്നെയാണ് മത്സരത്തിലെ മാൻ ഓഫ് ദി മാച്ച് പുരസ്കാരം സ്വന്തമാക്കിയത്. എന്നാൽ ഈ താരത്തിന് അർഹിക്കുന്ന പ്രശംസ ലഭിക്കാത്തതിൽ സ്പെയിനിന്റെ പരിശീലകനായ ലാ ഫൂന്റെ കടുത്ത ദേഷ്യത്തിലാണ്. വേറെ ഏതെങ്കിലും താരമായിരുന്നുവെങ്കിൽ നിങ്ങൾ അദ്ദേഹത്തെക്കുറിച്ച് നിർത്താതെ സംസാരിക്കുമായിരുന്നു എന്നാണ് സ്പാനിഷ് പരിശീലകൻ പറഞ്ഞിട്ടുള്ളത്.അദ്ദേഹത്തിന്റെ വാക്കുകൾ ഇങ്ങനെയാണ്.
” അദ്ദേഹത്തിന്റെ പേര് ഫാബിയാൻ എന്നല്ലായിരുന്നുവെങ്കിൽ,അദ്ദേഹത്തിന്റെ സ്ഥാനത്തെ മറ്റേതെങ്കിലും താരം ആയിരുന്നുവെങ്കിൽ, നിങ്ങൾ ആ താരത്തെക്കുറിച്ച് നിർത്താതെ സംസാരിക്കുമായിരുന്നു. എല്ലാ കഴിവുകളും ഉള്ള താരമാണ് റൂയിസ്. എല്ലാ സമയങ്ങളിലും എങ്ങനെ മികച്ച പ്രകടനം പുറത്തെടുക്കണം എന്നതിനെക്കുറിച്ച് അദ്ദേഹത്തിന് നന്നായി അറിയാം ” ഇതാണ് സ്പാനിഷ് പരിശീലകൻ പറഞ്ഞിട്ടുള്ളത്.
അതായത് മറ്റുള്ള താരങ്ങൾക്ക് ലഭിക്കുന്ന അഭിനന്ദനങ്ങളും പ്രശംസകളും ഈ താരത്തിനു കൂടി നൽകാത്തതിലാണ് പരിശീലകൻ അതൃപ്തി പ്രകടിപ്പിച്ചിട്ടുള്ളത്. ആദ്യ മത്സരത്തിൽ തന്നെ മികച്ച വിജയം നേടാൻ കഴിഞ്ഞു എന്നത് സ്പെയിനിന് സന്തോഷം നൽകുന്ന കാര്യമാണ്. ഇനി ഇറ്റലി,അൽബേനിയ എന്നിവർക്കെതിരെയാണ് സ്പെയിൻ അടുത്ത മത്സരങ്ങൾ കളിക്കുക.
