വെഗോസ്റ്റിന്റെ വിവാദ സെലിബ്രേഷൻ,അപ്പോൾ അത്ര ചിന്തിച്ചില്ലെന്ന് താരം!
കഴിഞ്ഞ ദിവസം നേഷൻസ് ലീഗിൽ നടന്ന മത്സരത്തിൽ നെതർലാന്റ്സ് മികച്ച വിജയം സ്വന്തമാക്കിയിരുന്നു.എതിരില്ലാത്ത നാല് ഗോളുകൾക്കാണ് അവർ ഹംഗറിയെ പരാജയപ്പെടുത്തിയത്. എന്നാൽ ഈ മത്സരത്തിന്റെ തുടക്കത്തിൽ തന്നെ ഹംഗറിയുടെ പരിശീലകൻ കുഴഞ്ഞ് വീണിരുന്നു. ഇത് വലിയ ആശങ്കകൾക്ക് ഇടയാക്കി.പിന്നീട് മത്സരം പുനരാരംഭിക്കുകയായിരുന്നു. തുടർന്ന് നെതർലാന്റ്സിന് ലഭിച്ച പെനാൽറ്റി വെഗോസ്റ്റ് ഗോളാക്കി മാറ്റുകയും ചെയ്തു.
എന്നാൽ ഒരല്പം കടന്ന രീതിയിലാണ് അദ്ദേഹം സെലിബ്രേഷൻ നടത്തിയത്.ഇതിനെതിരെ വലിയ വിമർശനങ്ങൾ ഫുട്ബോൾ ലോകത്ത് ഉയർന്നിരുന്നു.സാഹചര്യത്തിന് അനുസരിച്ച് സെലിബ്രേറ്റ് ചെയ്യാൻ പഠിക്കണം എന്നായിരുന്നു പലരും വെഗോസ്റ്റിനോട് പറഞ്ഞിരുന്നത്. ഏതായാലും ഈ വിമർശനങ്ങൾ അദ്ദേഹം ഉൾക്കൊണ്ടിട്ടുണ്ട്.ആ സമയത്ത് താൻ അത്ര ചിന്തിച്ചില്ല എന്നാണ് അദ്ദേഹം പറഞ്ഞിട്ടുള്ളത്. സെലിബ്രേഷൻ ഒരല്പം കടന്ന കൈയായി പോയി എന്നത് അദ്ദേഹം സമ്മതിക്കുകയും ചെയ്തിട്ടുണ്ട്.വെഗോസ്റ്റിന്റെ വാക്കുകൾ ഇങ്ങനെയാണ്.
” തീർച്ചയായും ഒരു ജീവനേക്കാൾ പ്രധാനപ്പെട്ടതല്ല എന്റെ പെനാൽറ്റി. അത് എനിക്ക് മറ്റാരോടും വിശദീകരിച്ച് നൽകേണ്ട കാര്യമില്ല എന്ന് തോന്നുന്നു.മത്സരത്തിനിടയിൽ ഞാൻ അത്ര ചിന്തിച്ചില്ല. മത്സരം ആരംഭിച്ചതോടെ ആ ടെൻഷനിൽ നിന്നും നമ്മൾ മാറുകയായിരുന്നു. പക്ഷേ ആ സെലിബ്രേഷൻ സമയത്ത് ഞാൻ അത്രകണ്ട് ചിന്തിച്ചില്ല. ആദ്യ പകുതിക്ക് ശേഷം ഞാൻ തന്നെ അദ്ദേഹത്തിന്റെ വിവരങ്ങൾ തിരക്കിയിരുന്നു. ഡ്രസ്സിംഗ് റൂമിൽ പോയി നോക്കി. അദ്ദേഹത്തിന് കുഴപ്പങ്ങൾ ഒന്നും ഉണ്ടായിരുന്നില്ല.അദ്ദേഹം സംസാരിക്കുന്നുണ്ടായിരുന്നു. അതിന് ഞാൻ ദൈവത്തോട് നന്ദി പറയുന്നു ” ഇതാണ് വെഗോസ്റ്റ് പറഞ്ഞിട്ടുള്ളത്.
കഴിഞ്ഞ ഖത്തർ വേൾഡ് കപ്പിൽ സൂപ്പർതാരം ലയണൽ മെസ്സിയുമായി ഒന്ന് ഉടക്കിയ താരമാണ് വെഗോസ്റ്റ്.നേരത്തെ അദ്ദേഹം മാഞ്ചസ്റ്റർ യുണൈറ്റഡ് വേണ്ടി കളിക്കുകയും ചെയ്തിരുന്നു. നിലവിൽ ഡച്ച് ക്ലബ്ബായ അയാക്സിനു വേണ്ടിയാണ് അദ്ദേഹം കളിച്ചുകൊണ്ടിരിക്കുന്നത്.
