വിനി എന്ത്കൊണ്ട് ബ്രസീൽ ജേഴ്‌സിയിൽ ബുദ്ദിമുട്ടുന്നു? മറുപടിയുമായി ആലിസൺ
കോപ്പ അമേരിക്കയിൽ തങ്ങളുടെ മൂന്നാമത്തെ മത്സരം കളിക്കാനുള്ള ഒരുക്കത്തിലാണ് ഇപ്പോൾ വമ്പൻമാരായ ബ്രസീൽ ഉള്ളത്. എതിരാളികൾ കൊളംബിയയാണ്. നാളെ പുലർച്ചെ ഇന്ത്യൻ സമയം 6:30നാണ് ഈയൊരു മത്സരം നടക്കുക.ഒരു വലിയ അപരാജിത കുതിപ്പ് നടത്തി കൊണ്ടാണ് കൊളംബിയ ഇപ്പോൾ വരുന്നത്.അതുകൊണ്ടുതന്നെ കൊളംബിയ ബ്രസീലിന് വലിയ വെല്ലുവിളി ഉയർത്തിയേക്കാം.
ബ്രസീലിയൻ സൂപ്പർ താരമായ വിനീഷ്യസ് ജൂനിയർ ഇരട്ട ഗോളുകൾ നേടി കൊണ്ട് കഴിഞ്ഞ മത്സരത്തിൽ ഫോമിലേക്ക് മടങ്ങിയെത്തിയിരുന്നു. എന്നാൽ മാഡ്രിഡിന് വേണ്ടി പുറത്തെടുക്കുന്ന മികച്ച പ്രകടനം പലപ്പോഴും ബ്രസീലിന് വേണ്ടി പുറത്തെടുക്കാൻ വിനീഷ്യസിന് സാധിക്കാറില്ല. ഇക്കാര്യത്തിൽ ഒരു വിശദീകരണം ബ്രസീലിന്റെ ഗോൾകീപ്പറായ ആലിസൺ ബക്കർ നൽകിയിട്ടുണ്ട്.അദ്ദേഹത്തിന്റെ വാക്കുകൾ ഇങ്ങനെയാണ്.
” ബ്രസീൽ ദേശീയ ടീമിന്റെ ജേഴ്സി ഒരു താരം അണിയുമ്പോൾ ആ താരത്തിന് അതോടൊപ്പം തന്നെ പ്രഷറും ഉത്തരവാദിത്വങ്ങളും ഉണ്ടാകുന്നു.പുറത്ത് നിന്ന് മാത്രമല്ല പ്രഷർ വരുന്നത്.സ്വന്തം പരിശീലകനിൽ നിന്ന് പോലും പ്രഷർ ഉണ്ടാകും.പക്ഷേ അത് സ്വാഭാവികമായ ഒരു കാര്യമാണ്. ബ്രസീൽ ടീമിൽ ക്ലബ്ബിലെ ലെവലിൽ തന്നെ കളിക്കാൻ വിനിക്ക് കഴിയും എന്ന കാര്യം എനിക്ക് ഉറപ്പാണ്.പക്ഷേ ഞങ്ങളുടെ ലക്ഷ്യം ഒരു ടീം എന്ന നിലയിൽ കൂടുതൽ മികച്ച പ്രകടനം നടത്തുക എന്നതാണ്.ലോകത്തിലെ ഏറ്റവും മികച്ച താരത്തിനുള്ള പുരസ്കാരം അദ്ദേഹം അർഹിക്കുന്നുണ്ട്. കോപ്പ അമേരിക്ക അതിന് അദ്ദേഹത്തെ സഹായിക്കുകയാണെങ്കിൽ ഞങ്ങൾ ഹാപ്പിയായിരിക്കും ” ഇതാണ് ബ്രസീൽ ഗോൾകീപ്പർ പറഞ്ഞിട്ടുള്ളത്.
നാളത്തെ മത്സരത്തിലും വിനി മികച്ച പ്രകടനം നടത്തുമെന്ന് പ്രതീക്ഷയിലാണ് ബ്രസീൽ ആരാധകർ ഉള്ളത്. അതേസമയം ഗോൾകീപ്പർ ആയ ആലിസണും മികച്ച പ്രകടനമാണ് നടത്തിക്കൊണ്ടിരിക്കുന്നത്. കഴിഞ്ഞ മത്സരത്തിൽ നിർണായകമായ സേവുകൾ അദ്ദേഹത്തിന്റെ ഭാഗത്ത് നിന്നുണ്ടായിരുന്നു.
