മെസ്സിയുടെ പെനാൽറ്റി തടയുക തന്നെ ചെയ്യും: വെല്ലുവിളിയുമായി ഹോളണ്ട് ഗോൾകീപ്പർ.

ഖത്തർ വേൾഡ് കപ്പിലെ ക്വാർട്ടർ ഫൈനൽ പോരാട്ടത്തിൽ ലാറ്റിനമേരിക്കൻ വമ്പൻമാരായ അർജന്റീനയുടെ എതിരാളികൾ യൂറോപ്യൻ ശക്തികളായ ഹോളണ്ടാണ്. നാളെ രാത്രി ഇന്ത്യൻ സമയം 12:30നാണ് ഈയൊരു പോരാട്ടം നടക്കുക.സെമിഫൈനൽ മാത്രം ലക്ഷ്യമിട്ടുകൊണ്ടാണ് രണ്ട് ടീമുകളും ഇറങ്ങുക എന്നുള്ളതിനാൽ ഒരു തകർപ്പൻ മത്സരം കാണാൻ കഴിഞ്ഞേക്കും.

അതേസമയം ഈ മത്സരത്തിനു മുന്നോടിയായി ഹോളണ്ടിന്റെ ഗോൾ കീപ്പറായ ആൻഡ്രിയാസ്‌ നോപ്പേർട്ട് ഒരു വെല്ലുവിളി നടത്തിയിട്ടുണ്ട്. അതായത് ലയണൽ മെസ്സി പെനാൽറ്റി എടുക്കുകയാണെങ്കിൽ അത് തനിക്ക് തടയാൻ കഴിയുമെന്ന് തന്നെയാണ് നോപ്പേർട്ട് പറഞ്ഞിട്ടുള്ളത്. ഈ ടൂർണമെന്റിൽ മെസ്സി പെനാൽറ്റി പാഴാക്കുന്നത് നമ്മൾ കണ്ടതാണെന്നും ഹോളണ്ട് ഗോൾകീപ്പർ കൂട്ടിച്ചേർത്തിട്ടുണ്ട്.അദ്ദേഹത്തിന്റെ വാക്കുകൾ ഇങ്ങനെയാണ്.

” മെസ്സി പെനാൽറ്റി എടുക്കുകയാണെങ്കിൽ അദ്ദേഹത്തിന് അത് നഷ്ടപ്പെടുത്താം.ടൂർണമെന്റിന്റെ തുടക്കത്തിൽ മെസ്സി പെനാൽറ്റി പാഴാക്കുന്നത് നമ്മൾ എല്ലാവരും കണ്ടതാണ്. എല്ലാ മനുഷ്യന്മാരെ പോലെയും മെസ്സി ഒരേ കാലുകൊണ്ട് തന്നെയാണ് എപ്പോഴും പെനാൽറ്റി എടുക്കാറുള്ളത്.തീർച്ചയായും അദ്ദേഹം മികച്ച താരമാണ്.എന്നിരുന്നാലും മെസ്സിയുടെ പെനാൽറ്റി തടഞ്ഞിടാൻ എനിക്ക് കഴിയും ” ഇതാണ് നോപ്പേർട്ട് പറഞ്ഞിട്ടുള്ളത്.

ഈ വേൾഡ് കപ്പിൽ മിന്നുന്ന പ്രകടനമാണ് ഡച്ച് ഗോൾകീപ്പറായ നോപ്പേർട്ട് നടത്തുന്നത്. അതോടൊപ്പം തന്നെ വാൻ ഡൈക്കും അക്കേയുമൊക്കെ ഉൾപ്പെടുന്ന പ്രതിരോധനിരയെ മറികടക്കണമെങ്കിൽ അർജന്റീന ഒരല്പം ബുദ്ധിമുട്ടേണ്ടി വന്നേക്കും.