മെസ്സിക്കോ ക്രിസ്റ്റ്യാനോക്കോ സാധിക്കാത്ത നേട്ടം,മുന്നൂറിന്റെ നിറവിൽ എംബപ്പേ.

ഇന്നലെ നടന്ന യൂറോ യോഗ്യത മത്സരത്തിൽ എതിരില്ലാത്ത 14 ഗോളുകൾക്കാണ് ഫ്രാൻസ് ജിബ്രാൾട്ടറിനെ തോൽപ്പിച്ചത്. സൂപ്പർ താരം കിലിയൻ എംബപ്പേ തന്നെയാണ് ഈ മത്സരത്തിൽ തിളങ്ങിയത്.മൂന്ന് ഗോളുകളും മൂന്ന് അസിസ്റ്റുകളും ആണ് ഈ മത്സരത്തിൽ എംബപ്പേ സ്വന്തമാക്കിയിട്ടുള്ളത്.തകർപ്പൻ പ്രകടനമാണ് ഈ സീസണിൽ അദ്ദേഹം നടത്തുന്നത്.

3 ഗോളുകൾ നേടിയതോടുകൂടി ക്ലബ്ബിനും രാജ്യത്തിനും വേണ്ടി ആകെ 300 ഗോളുകൾ പൂർത്തിയാക്കാൻ ഇപ്പോൾ കിലിയൻ എംബപ്പേക്ക് സാധിച്ചിട്ടുണ്ട്. കേവലം 24 വയസ്സ് മാത്രമാണ് ഇദ്ദേഹത്തിന്റെ പ്രായം എന്നത് ചേർത്തു വായിക്കേണ്ട കാര്യമാണ്. 25 വയസ്സിനുള്ളിൽ തന്നെ 300 ഗോളുകൾ പൂർത്തിയാക്കി എന്നത് അസാമാന്യമായ ഒരു നേട്ടമാണ്. കാരണം ലയണൽ മെസ്സിക്കോ ക്രിസ്റ്റ്യാനോ റൊണാൾഡോക്കോ നെയ്മർ ജൂനിയർക്കോ സാധിക്കാത്ത ഒന്നാണ് ഇത്.

തന്റെ കരിയറിലെ പതിനേഴാമത്തെ ഹാട്രിക്കാണ് എംബപ്പേ സ്വന്തമാക്കിയത്.ഈ സീസണിൽ ആകെ 21 ഗോളുകൾ താരം പൂർത്തിയാക്കി കഴിഞ്ഞു. ഈ വർഷം 46 ഗോളുകളാണ് താരം നേടിയിട്ടുള്ളത്.ഫ്രഞ്ച് ദേശീയ ടീമിന് വേണ്ടി ആകെ 46 ഗോളുകളും ഇപ്പോൾ താരം പൂർത്തിയാക്കി കഴിഞ്ഞു. ഇങ്ങനെ താരം അതിവേഗം കുതിച്ചുകൊണ്ടിരിക്കുകയാണ്.