മൂന്നാം മത്സരത്തിലും ഫ്രാൻസിന് രക്ഷയില്ല,ഗ്രൂപ്പിൽ അവസാന സ്ഥാനത്ത്!

യുവേഫ നേഷൻസ് ലീഗിൽ നടന്ന തങ്ങളുടെ മൂന്നാമത്തെ മത്സരത്തിലും ലോക ചാമ്പ്യന്മാരായ ഫ്രാൻസിന് വിജയമില്ല. ഇന്നലെ നടന്ന മത്സരത്തിൽ ഓസ്ട്രിയയാണ് ഫ്രാൻസിനെ സമനിലയിൽ തളച്ചത്. യഥാർത്ഥത്തിൽ ഫ്രാൻസ് തോൽവിയിൽ നിന്നും രക്ഷപ്പെടുകയായിരുന്നു.1-1 എന്ന സ്കോറിലാണ് മത്സരം അവസാനിച്ചത്.

മത്സരത്തിന്റെ 37-ആം മിനുട്ടിൽ വെയ്മാനിലൂടെ ഓസ്ട്രിയ ലീഡ് എടുക്കുകയായിരുന്നു.പിന്നീട് 83-ആം മിനുട്ടിലാണ് ഫ്രാൻസ് ഈ ഗോളിന് മറുപടി നൽകുന്നത്.എങ്കുങ്കുവിന്റെ അസിസ്റ്റിൽ നിന്നും കിലിയൻ എംബപ്പേയാണ് ഗോൾ നേടിയത്. ഗോളിലൂടെ ഫ്രാൻസ് തോൽവി ഒഴിവാക്കുകയായിരുന്നു.

അതേസമയം ഈ ഗ്രൂപ്പിൽ നടന്ന മറ്റൊരു മത്സരത്തിൽ വമ്പൻമാരായ ക്രൊയേഷ്യ വിജയം നേടിയിട്ടുണ്ട്. ഏകപക്ഷീയമായ ഒരു ഗോളിനാണ് ക്രൊയേഷ്യ ഡെൻമാർക്കിനെ പരാജയപ്പെടുത്തിയത്.മരിയോ പസലിച്ചാണ് ക്രൊയേഷ്യയുടെ വിജയഗോൾ നേടിയത്.

മൂന്ന് മത്സരങ്ങൾ പൂർത്തിയായപ്പോൾ 6 പോയിന്റുമായി ഡെന്മാർക്കാണ് ഒന്നാം സ്ഥാനത്ത്.4 പോയിന്റുള്ള ഓസ്ട്രിയ രണ്ടാംസ്ഥാനത്തും ഇതേ പോയിന്റുള്ള ക്രൊയേഷ്യ മൂന്നാം സ്ഥാനത്തുമാണ്.2 പോയിന്റ് മാത്രമുള്ള നിലവിലെ ചാമ്പ്യൻമാരായ ഫ്രാൻസാണ് അവസാന സ്ഥാനത്തുള്ളത്.