മുള്ളർ ട്രോഫി : ബാലൺ ഡി’ഓറിനൊപ്പം പുതിയ പുരസ്കാരം പ്രഖ്യാപിച്ച് ഫ്രാൻസ് ഫുട്ബോൾ!

ഈ വർഷത്തെ ഏറ്റവും മികച്ച താരത്തിനുള്ള ബാലൺ ഡി’ഓർ പുരസ്കാരം വരുന്ന ഒക്ടോബർ പതിനേഴാം തീയതിയാണ് ഫ്രാൻസ് ഫുട്ബോൾ സമ്മാനിക്കുക. ഇതിനുള്ള 30 പേരുടെ ഷോർട്ട് ലിസ്റ്റ് നേരത്തെതന്നെ ഫ്രാൻസ് ഫുട്ബോൾ പ്രസിദ്ധീകരിച്ചിരുന്നു. സൂപ്പർ താരം ലയണൽ മെസ്സി ഈ ചുരുക്കപ്പട്ടികയിൽ ഇല്ലാത്തത് ഫുട്ബോൾ ലോകത്ത് വലിയ ചർച്ചയാവുകയും ചെയ്തിരുന്നു.

കഴിഞ്ഞ സീസണിൽ മിന്നുന്ന പ്രകടനം പുറത്തെടുത്ത കരിം ബെൻസിമക്ക് തന്നെയാണ് ഈ ബാലൺ ഡി’ഓർ പുരസ്കാരത്തിന് ഏറ്റവും കൂടുതൽ സാധ്യത കൽപ്പിക്കപ്പെടുന്നത്. എന്നാൽ ഈ ബാലൺ ഡി’ഓർ പുരസ്കാരത്തിനോടൊപ്പം പുതിയ ഒരു ട്രോഫി കൂടി ഇപ്പോൾ ഫ്രാൻസ് ഫുട്ബോൾ പ്രഖ്യാപിച്ചിട്ടുണ്ട്. മുള്ളർ ട്രോഫി എന്നാണ് ഇതിന് നാമകരണം ചെയ്തിട്ടുള്ളത്.

1970-ലെ ബാലൺ ഡി’ഓർ പുരസ്കാര ജേതാവും ഇതിഹാസവുമായ ജെർഡ് മുള്ളറുടെ പേരിലാണ് ഈ ട്രോഫി അറിയപ്പെടുക. അതായത് ക്ലബ്ബിനും രാജ്യത്തിനും വേണ്ടി ഏറ്റവും കൂടുതൽ ഗോളുകൾ നേടിയ സ്ട്രൈക്കർക്കാണ് ഈ പുരസ്കാരം സമ്മാനിക്കുക എന്നാണ് ഫ്രാൻസ് ഫുട്ബോൾ അറിയിച്ചിട്ടുള്ളത്. കഴിഞ്ഞ തവണയാണ് ഈ പുരസ്കാരം ഫ്രാൻസ് ഫുട്ബോൾ നൽകാൻ ആരംഭിച്ചിരുന്നത്. റോബർട്ട് ലെവന്റോസ്ക്കിയായിരുന്നു ടോപ്പ് സ്കോറർക്കുള്ള ഈ പുരസ്കാരം നേടിയത്. എന്നാൽ അന്ന് ഇതിന് മുള്ളർ ട്രോഫി എന്ന പേര് ലഭിച്ചിരുന്നില്ല. ഈ വർഷം മുതലാണ് ഈ പുരസ്കാരം മുള്ളർ ട്രോഫി എന്ന പേരിൽ അറിയപ്പെടുക.

ഈ വർഷം ആരായിരിക്കും മുള്ളർ ട്രോഫി നേടുക എന്നുള്ളതാണ് ആരാധകർ ഉറ്റു നോക്കുന്നത്. ട്രാൻസ്ഫർ മാർക്കറ്റിന്റെ കണക്കുകൾ പ്രകാരം രാജ്യത്തിനും ക്ലബ്ബിനും വേണ്ടി ബെൻസിമയും ലെവന്റോസ്ക്കിയും 50 ഗോളുകൾ വീതം നേടിയിട്ടുണ്ട്. അതുകൊണ്ടുതന്നെ ആർക്കായിരിക്കും മുള്ളർ ട്രോഫി ലഭിക്കുക എന്നുള്ളത് അവ്യക്തമായ കാര്യമാണ്.