ബ്രസീൽ പുറത്ത്,ക്രോയേഷ്യ സെമിയിൽ!

ഖത്തർ വേൾഡ് കപ്പിൽ നടന്ന ആദ്യ ക്വാർട്ടർ ഫൈനൽ പോരാട്ടത്തിൽ ബ്രസീലിനെ തോൽവി. പെനാൽറ്റി ഷൂട്ടൗട്ടിൽ 4-2 എന്ന സ്കോറിനാണ് ബ്രസീലിനെ ക്രൊയേഷ്യ പരാജയപ്പെടുത്തിയത്. ഇതോടെ കിരീട ഫേവറൈറ്റുകളായി വന്ന ബ്രസീൽ ഖത്തർ വേൾഡ് കപ്പിൽ നിന്നും പുറത്താവുകയായിരുന്നു.ക്രൊയേഷ്യ സെമി ഫൈനലിൽ പ്രവേശിക്കുകയും ചെയ്തു.

മത്സരത്തിന്റെ നിശ്ചിത 90 മിനിറ്റ് സമയത്ത് ഇരു ടീമുകൾക്കും ഗോളുകൾ ഒന്നും നേടാൻ കഴിഞ്ഞിരുന്നില്ല. പിന്നീട് മത്സരത്തിന്റെ അധികസമയത്താണ് നെയ്മർ ജൂനിയർ ബ്രസീലിനെ ലീഡ് നേടിക്കൊടുക്കുന്നത്.ലുകാസ് പക്കേറ്റയുടെ അസിസ്റ്റിൽ നിന്നാണ് നെയ്മറുടെ ഗോൾ പിറന്നത്.എന്നാൽ ആ ലീഡിന് അധികം ആയുസ്സ് ഉണ്ടായിരുന്നില്ല.117ആം മിനുട്ടിൽ പെറ്റ്കോവിച്ച് ക്രൊയേഷ്യയ്ക്ക് വേണ്ടി സമനില ഗോൾ നേടിയതോടെ മത്സരം പെനാൽറ്റി ഷൂട്ടൗട്ടിലേക്ക് നീങ്ങുകയായിരുന്നു.

ബ്രസീലിന് വേണ്ടി പെനാൽറ്റിയെടുത്ത റോഡ്രിഗോ,മാർക്കിഞ്ഞോസ്‌ എന്നിവർക്ക് പിഴക്കുകയായിരുന്നു. അതേസമയം ക്രൊയേഷ്യയുടെ നാലുപേരും ഗോളാക്കി മാറ്റിയതോടെ ക്രൊയേഷ്യ സെമിഫൈനലിൽ പ്രവേശിക്കുകയും ബ്രസീൽ വേൾഡ് കപ്പിൽ നിന്ന് പുറത്താവുകയും ചെയ്തു.