ബ്രസീലിനെ പൂട്ടി കൊളംബിയ, ഇനി എതിരാളികൾ ഉറുഗ്വ!
ഇന്ന് കോപ്പ അമേരിക്കയിൽ നടന്ന ഗ്രൂപ്പ് ഘട്ടത്തിലെ അവസാന മത്സരത്തിലും ബ്രസീലിന് സമനില വഴങ്ങേണ്ടിവന്നു. കരുത്തരായ കൊളംബിയയാണ് ബ്രസീലിനെ സമനിലയിൽ തളച്ചത്.2 ടീമുകളും ഓരോ ഗോളുകൾ വീതം നേടുകയായിരുന്നു. ഇതോടെ ഗ്രൂപ്പിൽ ഒന്നാം സ്ഥാനത്ത് കൊളംബിയയും രണ്ടാം സ്ഥാനത്ത് ബ്രസീലും ഫിനിഷ് ചെയ്തു.
ബ്രസീലിന് വേണ്ടി റാഫീഞ്ഞയാണ് ഗോൾ കണ്ടെത്തിയത്. അദ്ദേഹത്തിന്റെ കിടിലൻ ഫ്രീകിക്കാണ് ബ്രസീലിന് ലീഡ് സമ്മാനിച്ചത്. എന്നാൽ അധികം വൈകാതെ തന്നെ മുനിയോസ് കൊളംബിയയെ ഒപ്പമെത്തിച്ചു.അതിനുശേഷം ഗോളുകൾ ഒന്നും പിറക്കാതെ വന്നതോടെ മത്സരം സമനിലയിൽ കലാശിക്കുകയായിരുന്നു. മത്സരത്തിൽ ബ്രസീലിനേക്കാൾ മികച്ച രൂപത്തിൽ കളിച്ചത് കൊളംബിയ തന്നെയാണ് എന്ന് പറയേണ്ടിവരും.
ഗ്രൂപ്പിൽ 7 പോയിന്റ് സ്വന്തമാക്കി കൊണ്ട് കൊളംബിയ ഒന്നാം സ്ഥാനത്ത് ഫിനിഷ് ചെയ്തു.5 പോയിന്റുള്ള ബ്രസീൽ രണ്ടാം സ്ഥാനത്താണ് ഫിനിഷ് ചെയ്തിട്ടുള്ളത്.ക്വാർട്ടറിൽ ബ്രസീലിന്റെ എതിരാളികൾ കരുത്തരായ ഉറുഗ്വയാണ്.അതേസമയം കൊളംബിയയും പനാമയും തമ്മിൽ ഏറ്റുമുട്ടും. നിലവിൽ തകർപ്പൻ പ്രകടനം പുറത്തെടുക്കുന്ന ഉറുഗ്വയെ പരാജയപ്പെടുത്തണമെങ്കിൽ ബ്രസീൽ നന്നായി വിയർക്കേണ്ടി വരും.
