ബെൽജിയം പൊട്ടി, കഷ്ടിച്ച് വിജയിച്ച് ഫ്രാൻസ്!

ഇന്നലെ യുവേഫ യൂറോ കപ്പിൽ നടന്ന മത്സരത്തിൽ കരുത്തരായ ബെൽജിയത്തിന് അട്ടിമറി തോൽവി ഏറ്റുവാങ്ങേണ്ടി വന്നിട്ടുണ്ട്.ഏകപക്ഷീയമായ ഒരു ഗോളിനാണ് സ്ലോവാക്യ ബെൽജിയത്തെ പരാജയപ്പെടുത്തിയിട്ടുള്ളത്. മത്സരത്തിന്റെ ഏഴാം മിനിറ്റിൽ തന്നെ ഇവാൻ ശ്രാൻസ് സ്ലോവാക്യക്ക് വേണ്ടി ഗോൾ നേടുകയായിരുന്നു. ആ ഗോളിന് മറുപടി നൽകാൻ ബെൽജിയത്തിന് സാധിക്കാതെ പോവുകയായിരുന്നു.

ലുക്കാക്കു,ഡോക്കു,ഡി ബ്രൂയിന,ട്രോസാർഡ് എന്നീ സൂപ്പർ താരങ്ങളെ അണിനിരത്തി കൊണ്ടു തന്നെയാണ് ബെൽജിയം ഇറങ്ങിയിരിക്കുന്നത്. പക്ഷേ അവർക്ക് ഗോളുകൾ നേടാനാവാതെ പോയി. പ്രത്യേകിച്ച് സ്ട്രൈക്കർ ലുക്കാക്കു ഒരുപാട് അവസരങ്ങൾ പാഴാക്കുകയായിരുന്നു.അത് അവർക്ക് തിരിച്ചടിയായി.ആദ്യ മത്സരത്തിൽ തന്നെ തോൽവി വഴങ്ങിയതോടെ ബെൽജിയത്തിന് കാര്യങ്ങൾ സങ്കീർണ്ണമായിട്ടുണ്ട്.

അതേസമയം വമ്പൻമാരായ ഫ്രാൻസ് ഇന്നലെ വിജയിച്ചു കൊണ്ട് തുടങ്ങിയിട്ടുണ്ട്. എതിരില്ലാത്ത ഒരു ഗോളിനാണ് അവർ ഓസ്ട്രിയയെ പരാജയപ്പെടുത്തിയത്. ഫ്രാൻസിനോട് കിടപിടിക്കുന്ന പ്രകടനമാണ് ഓസ്ട്രിയ നടത്തിയിട്ടുള്ളത്. മത്സരത്തിന്റെ 38ആം മിനുട്ടിൽ വോബർ വഴങ്ങിയ സെൽഫ് ഗോൾ ആണ് ഫ്രാൻസിന് തുണയായിട്ടുള്ളത്.

മത്സരത്തിൽ കാന്റെ മികച്ച പ്രകടനം ഫ്രാൻസിന് വേണ്ടി പുറത്തെടുത്തിട്ടുണ്ട്.മാൻ ഓഫ് ദി മാച്ച് പുരസ്കാരം സ്വന്തമാക്കിയതും അദ്ദേഹം തന്നെയാണ്. ഇനി ഫ്രാൻസ് തങ്ങളുടെ അടുത്ത മത്സരം കരുത്തരായ നെതർലാന്റ്സിനെതിരെയാണ് കളിക്കുക.