പിതാവിന്റെ വിയോഗ വാർത്തയറിയാതെ വേൾഡ് കപ്പ് ഫൈനലിൽ ഗോളടിച്ച് കിരീടം നേടിക്കൊടുത്തു,നൊമ്പരമായി ഒൽഗ.

കഴിഞ്ഞ ദിവസമായിരുന്നു വിമൻസ് വേൾഡ് കപ്പ് ഫൈനൽ മത്സരം അരങ്ങേറിയിരുന്നത്. യൂറോപ്പ്യൻ കരുത്തരായ ഇംഗ്ലണ്ടും സ്പെയിനും തമ്മിലായിരുന്നു ഫൈനലിൽ ഏറ്റുമുട്ടിയിരുന്നത്. ഏകപക്ഷീയമായ ഒരു ഗോളിന് ഇംഗ്ലണ്ടിനെ പരാജയപ്പെടുത്തിക്കൊണ്ട് കിരീടം നേടാൻ സ്പയിനിന് സാധിച്ചിരുന്നു. ആദ്യമായാണ് സ്പെയിൻ വിമൻസ് വേൾഡ് കപ്പ് കിരീടം സ്വന്തമാക്കുന്നത്.

മത്സരത്തിൽ സ്പാനിഷ് ടീമിന്റെ ഹീറോയായത് പ്രതിരോധനിര താരമായ ഒൽഗ കാർമോണയാണ്. മത്സരത്തിന്റെ 29 മിനിട്ടിലാണ് ഈ റയൽ മാഡ്രിഡ് താരം ഗോൾ നേടിയത്. ഈ ഏക ഗോളിലാണ് സ്പെയിൻ വേൾഡ് കപ്പ് കിരീടം സ്വന്തമാക്കിയത്. എന്നാൽ വേൾഡ് കപ്പ് ഫൈനലിൽ ഹീറോയായതിനു ശേഷം ഒൽഗയെ തേടിയെത്തിയത് ഹൃദയഭേദകമായ ഒരു വാർത്തയായിരുന്നു.

താരത്തിന്റെ പിതാവ് ലോകത്തോട് വിട പറഞ്ഞിരുന്നു. ഈ വേൾഡ് കപ്പ് ഫൈനൽ നടക്കുന്നതിന് മുന്നേ തന്നെ അദ്ദേഹം അന്തരിച്ചിരുന്നു. എന്നാൽ സ്പാനിഷ് ഫുട്ബോൾ ഫെഡറേഷൻ ഈ വിയോഗവാർത്ത താരത്തെ അറിയിച്ചിരുന്നില്ല.പിതാവ് ലോകത്തോട് വിട പറഞ്ഞത് അറിയാതെയാണ് ഒൽഗ ഈ മത്സരം കളിച്ചതും വേൾഡ് കപ്പ് കിരീടം നേടിക്കൊടുത്തതും. അതിന് ശേഷം എല്ലാവിധ ആഘോഷ പരിപാടികളിലും അവർ പങ്കെടുത്തിരുന്നു. എല്ലാം അവസാനിച്ചതിനുശേഷം മാത്രമാണ് പിതാവിന്റെ വിയോഗ വാർത്ത ഒൽഗയെ സ്പാനിഷ് ഫുട്ബോൾ ഫെഡറേഷൻ അറിയിച്ചത്.

പിന്നാലെ അവർ സ്റ്റേറ്റ്മെന്റ് ഇറക്കുകയും ചെയ്തിട്ടുണ്ട്. കുടുംബത്തിന്റെ ദുഃഖത്തിൽ പങ്കുചേരുന്നു എന്നാണ് സ്പാനിഷ് ഫുട്ബോൾ ഫെഡറേഷൻ അറിയിച്ചത്. താരത്തിന്റെ ക്ലബ്ബായ റയൽ മാഡ്രിഡും അനുശോചന കുറിപ്പ് ഇറക്കിയിട്ടുണ്ട്. ഏതായാലും വളരെ നൊമ്പരപ്പെടുത്തിയ ഒരു വാർത്ത തന്നെയായിരുന്നു ഇന്നലെ പുറത്തേക്ക് വന്നിരുന്നത്.