നെയ്മറുടെ കടുത്ത ആരാധകൻ,യമാലും നിക്കോയും നടത്തിയത് നെയ്മർ സെലിബ്രേഷൻ!
ഇന്നലെ യൂറോ കപ്പിൽ നടന്ന പ്രീ ക്വാർട്ടർ പോരാട്ടത്തിൽ ഗംഭീര വിജയമാണ് സ്പെയിൻ സ്വന്തമാക്കിയത്.ഒന്നിനെതിരെ നാല് ഗോളുകൾക്കാണ് അവർ ജോർജിയയെ പരാജയപ്പെടുത്തിയത്. ഒരു ഗോളിന് പുറകിൽ പോയ സ്പെയിൻ നാലെണ്ണം തിരിച്ചടിക്കുകയായിരുന്നു. ഓരോ ഗോളും ഓരോ അസിസ്റ്റും വീതം നേടിയ ഫാബിയാൻ റൂയിസ്,നിക്കോ വില്യംസ് എന്നിവരാണ് സ്പെയിനിന് വേണ്ടി തിളങ്ങിയത്.
16 കാരനായ ലാമിനെ യമാലും തകർപ്പൻ പ്രകടനമാണ് മത്സരത്തിൽ നടത്തിയത്. ഒരു അസിസ്റ്റ് സ്വന്തമാക്കാൻ അദ്ദേഹത്തിന് കഴിഞ്ഞിരുന്നു.നിക്കോ വില്യംസും യമാലും വളരെ അടുത്ത സുഹൃത്തുക്കളാണ്.ഇവരുടെ കളിക്കളത്തിലെ ഓരോ പ്രവർത്തിയിലും നമുക്കത് കാണാൻ കഴിയും.ഇന്നലെ ഇരുവരും ഒരുമിച്ച് ഗോൾ ആഘോഷിച്ചിരുന്നു. ഡാൻസ് സെലിബ്രേഷൻ നടത്തി കൊണ്ടാണ് ഇവർ ഗോൾ നേട്ടം ആഘോഷിച്ചിരുന്നത്.
ആ ഡാൻസ് സെലിബ്രേഷൻ മറ്റാരുടേതും അല്ല, സാക്ഷാൽ നെയ്മർ ജൂനിയറുടേതാണ്.സാന്റോസിൽ വെച്ച് നെയ്മർ നടത്തിയ അതേ ഡാൻസ് തന്നെയാണ് ഇന്നലെ യമാലും നിക്കോ വില്യംസും അനുകരിച്ചിട്ടുള്ളത്. ഇതിന്റെ വീഡിയോ ദൃശ്യങ്ങൾ എക്സ് ഉൾപ്പെടെയുള്ള സാമൂഹിക മാധ്യമങ്ങളിൽ ലഭ്യമാണ്.നെയ്മറെ വളരെയധികം ഇഷ്ടപ്പെടുന്ന ഒരു വ്യക്തിയാണ് താൻ എന്നത് നേരത്തെ ലാമിനെ യമാൽ വ്യക്തമാക്കിയിട്ടുള്ള കാര്യമാണ്.
നെയ്മറോടൊപ്പം കളിക്കാൻ തനിക്ക് ആഗ്രഹമുണ്ടെന്ന് യമാൽ പറഞ്ഞിരുന്നു. നെയ്മറുടെ ഫോൺ നമ്പർ ഫോണിൽ ഉണ്ടായിരിക്കാൻ താൻ ആഗ്രഹിക്കുന്നുവെന്നും യമാൽ വ്യക്തമാക്കിയിരുന്നു. ജമാൽ മുസിയാല,സാവി സിമൺസ് തുടങ്ങിയ ഒരുപാട് യുവ സൂപ്പർതാരങ്ങൾ നെയ്മറോടുള്ള ഇഷ്ടവും ആരാധനയും ഈയിടെ പങ്കുവെച്ചിരുന്നു. നെയ്മർ തങ്ങളുടെ ഐഡോളാണെന്ന് വിനീഷ്യസും റോഡ്രിഗോയും ആവർത്തിച്ചാവർത്തിച്ച് പറയുന്ന ഒരു കാര്യമാണ്.
