നാലടിച്ച് എംബപ്പേ, ഗോൾ മഴ പെയ്യിച്ച് ഫ്രാൻസ് വേൾഡ് കപ്പിൽ സ്ഥാനമുറപ്പിച്ചു!

ഇന്നലെ നടന്ന വേൾഡ് കപ്പ് യോഗ്യത മത്സരത്തിൽ ഫ്രാൻസിന് വമ്പൻ വിജയം.എട്ട് ഗോളുകൾക്കാണ് ഫ്രാൻസ് കസാക്കിസ്ഥാനെ പരാജയപ്പെടുത്തിയത്.നാല് ഗോളുകളും ഒരു അസിസ്റ്റും നേടിയ കിലിയൻ എംബപ്പേയാണ് ഫ്രാൻസിന് തകർപ്പൻ ജയം സമ്മാനിച്ചത്. സൂപ്പർ താരം കരിം ബെൻസിമ രണ്ട് ഗോളുകൾ നേടിയപ്പോൾ അഡ്രിയാൻ റാബിയോട്ട്, അന്റോയിൻ ഗ്രീസ്‌മാൻ എന്നിവർ ഓരോ ഗോളുകൾ വീതം നേടി.ജയത്തോടെ ഫ്രാൻസ് ഖത്തർ വേൾഡ് കപ്പിൽ സ്ഥാനമുറപ്പിച്ചു.നിലവിൽ 15 പോയിന്റുള്ള ഫ്രാൻസാണ് ഗ്രൂപ്പിൽ ഒന്നാമത്.

മത്സരത്തിന്റെ ആറാം മിനുട്ടിൽ തന്നെ എംബപ്പേ ഗോളടി തുടങ്ങി.തിയോ ഹെർണാണ്ടസായിരുന്നു അസിസ്റ്റ് നൽകിയത്.12,32 മിനിറ്റുകളിൽ ഗോളുകൾ നേടിക്കൊണ്ട് എംബപ്പേ ഹാട്രിക്ക് തികച്ചു.കോമാനായിരുന്നു ഈ രണ്ട് ഗോളുകൾക്കും അസിസ്റ്റ് നൽകിയത്.55,59 മിനുട്ടുകളിലാണ് ബെൻസിമ തന്റെ ഗോളുകൾ നേടിയത്.തിയോ, എംബപ്പേ എന്നിവരാണ് അസിസ്റ്റുകൾ നേടിയത്.75-ആം മിനുട്ടിൽ ഗ്രീസ്മാന്റെ അസിസ്റ്റിൽ നിന്ന് റാബിയോട്ടും 84-ആം മിനുട്ടിൽ ഗ്രീസ്മാൻ പെനാൽറ്റിയിലൂടെയും വല കുലുക്കിയപ്പോൾ ഫ്രഞ്ച് പട വമ്പൻ ജയമുറപ്പിച്ചു.87-ആം മിനുട്ടിൽ ഡിയാബിയുടെ അസിസ്റ്റിൽ നിന്ന് എംബപ്പേ നാലാം ഗോൾ കൂടി നേടിയതോടെ കസാക്കിസ്ഥാൻ എട്ട് ഗോളിന്റെ തോൽവി ഉറപ്പിക്കുകയായിരുന്നു.