ഞാനും മോഡ്രിച്ചും മികച്ച രൂപത്തിലാണ്,ഇനിയും കളി തുടരും: ക്രിസ്റ്റ്യാനോ

ഇന്നലെ യുവേഫ നേഷൻസ് ലീഗിൽ നടന്ന മത്സരത്തിൽ വിജയം സ്വന്തമാക്കാൻ പോർച്ചുഗലിന് സാധിച്ചിരുന്നു.ഒന്നിനെതിരെ 2 ഗോളുകൾക്കാണ് അവർ ക്രൊയേഷ്യയെ തോൽപ്പിച്ചത്. സൂപ്പർ താരം ക്രിസ്റ്റ്യാനോ റൊണാൾഡോ ഈ മത്സരത്തിൽ ഗോൾ നേടിയിരുന്നു.ഇതോടുകൂടി ഒരു അപൂർവ്വ റെക്കോർഡ് റൊണാൾഡോ സ്വന്തമാക്കിയിട്ടുണ്ട്. ഫുട്ബോളിൽ ആദ്യമായി 900 ഒഫീഷ്യൽ ഗോളുകൾ എന്ന നേട്ടമാണ് റൊണാൾഡോ സ്വന്തമാക്കിയിട്ടുള്ളത്.

റയൽ മാഡ്രിഡിൽ വെച്ചു കൊണ്ട് ഒരുപാട് കാലം ഒരുമിച്ച് കളിച്ചിട്ടുള്ള താരങ്ങളാണ് ക്രിസ്റ്റ്യാനോ റൊണാൾഡോയും ലൂക്ക മോഡ്രിച്ചും. ഇന്നലെ ഇരുവരും കളിക്കളത്തിൽ പരസ്പരം നേർക്കുനേർ വന്നിരുന്നു.38കാരനായ മോഡ്രിച്ചും 39 കാരനായ റൊണാൾഡോയും ഇപ്പോഴും കളിക്കളത്തിൽ തുടരുന്നുണ്ട്. ഇതേക്കുറിച്ച് ക്രിസ്റ്റ്യാനോ ചില കാര്യങ്ങൾ പറഞ്ഞിട്ടുണ്ട്.അദ്ദേഹത്തിന്റെ വാക്കുകൾ ഇങ്ങനെയാണ്.

“ലൂക്കയും ഞാനും സുഹൃത്തുക്കളാണ്.അദ്ദേഹം ഇപ്പോഴും കളിക്കുന്നതിൽ ഞാൻ വളരെയധികം സന്തോഷവാനാണ്.ഒരു മികച്ച വ്യക്തിയാണ് അദ്ദേഹം. അദ്ദേഹത്തിന് എതിരെയും ക്രൊയേഷ്യക്കെതിരെയും കളിക്കുന്നത് എന്നെ സംബന്ധിച്ചിടത്തോളം സന്തോഷം നൽകുന്ന ഒരു കാര്യമാണ്.മോഡ്രിച്ചും ഞാനും ഇപ്പോഴും മികച്ച രൂപത്തിലാണ് ഉള്ളത്. അതുകൊണ്ടുതന്നെ ഞങ്ങൾ ഇനിയും കളി തുടരും “ഇതാണ് റൊണാൾഡോ പറഞ്ഞിട്ടുള്ളത്.

നിലവിൽ റയൽ മാഡ്രിഡിൽ തന്നെയാണ് മോഡ്രിച്ച് തുടരുന്നത്. അതേസമയം റൊണാൾഡോ സൗദി അറേബ്യയിൽ തകർപ്പൻ പ്രകടനമാണ് നടത്തിക്കൊണ്ടിരിക്കുന്നത്. ഇനി അടുത്ത മത്സരത്തിൽ പോർച്ചുഗൽ സ്കോട്ട്ലാന്റിനെയാണ് നേരിടുക.ക്രിസ്റ്റ്യാനോ റൊണാൾഡോ ആ മത്സരത്തിലും തന്റെ ഗോൾ വേട്ട തുടരും എന്നാണ് ആരാധകർ പ്രതീക്ഷിക്കുന്നത്.