ഗോൾ നേടിയതിന് ശേഷമുള്ള ബെബെറ്റോയുടെ സെലിബ്രേഷൻ,കാരണം വെളിപ്പെടുത്തി ബ്രൂണോ ഗുയ്മിറസ്!

ഇന്ന് നടന്ന വേൾഡ് കപ്പ് യോഗ്യതാ മത്സരത്തിൽ തകർപ്പൻ വിജയം നേടാൻ ബ്രസീലിന് സാധിച്ചിരുന്നു. എതിരില്ലാത്ത നാലു ഗോളുകൾക്കാണ് ബ്രസീൽ ബൊളീവിയയെ പരാജയപ്പെടുത്തിയത്. മത്സരത്തിൽ മിന്നുന്ന പ്രകടനമായിരുന്നു മധ്യനിര താരമായ ബ്രൂണോ ഗുയ്മിറസ് കാഴ്ച്ചവെച്ചത്.ഒരു ഗോളും ഒരു അസിസ്റ്റും താരം മത്സരത്തിൽ സ്വന്തമാക്കിയിരുന്നു.

ബ്രസീലിന്റെ നാഷണൽ ടീമിന് വേണ്ടിയുള്ള താരത്തിന്റെ ആദ്യ ഗോളായിരുന്നു ഇത്. ഈ ഗോളിന് ശേഷം ബ്രസീലിയൻ ഇതിഹാസമായ ബെബറ്റോ 1994 വേൾഡ് കപ്പിൽ നടത്തിയ സെലിബ്രേഷൻ ബ്രൂണോ ഗുയ്മിറസ് അനുകരിക്കുകയും ചെയ്തിരുന്നു.ഒരു കുഞ്ഞിനെ താലോലിക്കുന്നത് പോലെയുള്ള ഒരു സെലിബ്രേഷനായിരുന്നു ഇത്.

ആ സെലിബ്രേഷന്റെ കാരണമിപ്പോൾ ബ്രൂണോ ഗുയ്മിറസ് വെളിപ്പെടുത്തിയിട്ടുണ്ട്.താനൊരു പിതാവാകാൻ പോകുന്നു എന്ന സന്തോഷവാർത്തയാണ് അദ്ദേഹം പങ്കുവച്ചത്. മത്സരശേഷമുള്ള പത്ര സമ്മേളനത്തിൽ സംസാരിക്കുകയായിരുന്നു അദ്ദേഹം.അദ്ദേഹത്തിന്റെ വാക്കുകൾ ഇങ്ങനെയാണ്.

” ഈയൊരു അനുഭവം അതുല്യമായിരുന്നു.ആ സെലിബ്രേഷൻ എനിക്ക് പിറക്കാൻ പോവുന്ന മകനോ മകൾക്കോ വേണ്ടിയാണ്.ഇക്കാര്യം എനിക്കുവേണ്ടി ആർപ്പു വിളിക്കുന്ന നല്ല ആളുകളോടൊപ്പം പങ്കുവെക്കാനായതിൽ ഞാൻ വളരെയധികം സന്തോഷവാനാണ്.ഒരു താരത്തിന്റെ കരിയറിലെ ഏറ്റവും ഉയർന്ന പോയിന്റാണ് ഗോൾ എന്നുള്ളത്.എന്റെ ദേശീയ ടീമിനോടൊപ്പമുള്ള ആദ്യ ഗോളാണിത്.അത്കൊണ്ട് തന്നെ ഞാൻ അത് ഫ്രെയിം ചെയ്ത് വെക്കും.ഇത് വളരെ മനോഹരമായിരുന്നു.ദേശീയ ടീമിനൊപ്പം ഇനിയും മികച്ച പ്രകടനങ്ങൾ കാഴ്ച വെക്കാനും ഗോളുകൾ നേടാനും കഴിയുമെന്നാണ് ഞാൻ പ്രതീക്ഷിക്കുന്നത്.എന്റെ കുട്ടിക്കാലം തൊട്ടേയുള്ള ഒരു സ്വപ്നമാണ് ഞാൻ ഇന്ന് പൂർത്തിയാക്കിയത് ” ബ്രൂണോ പറഞ്ഞു.

നിലവിൽ പ്രീമിയർ ലീഗ് ക്ലബായ ന്യൂകാസിൽ യുണൈറ്റഡിന് വേണ്ടിയാണ് ബ്രൂണോ കളിച്ചു കൊണ്ടിരിക്കുന്നത്.ന്യൂകാസിലിന് വേണ്ടിയും താരം ഗോൾ നേടിയിട്ടുണ്ട്.