ക്രിസ്റ്റ്യാനോ വലിയ ഇൻസ്പിരേഷൻ, യൂട്യൂബിൽ എപ്പോഴും വീഡിയോകൾ കാണാറുണ്ട് :ഹാലന്റ്

തകർപ്പൻ പ്രകടനമാണ് ഈ 38ആം വയസ്സിലും സൂപ്പർ താരം ക്രിസ്റ്റ്യാനോ റൊണാൾഡോ പുറത്തെടുക്കുന്നത്.സൗദി ലീഗിൽ ആകെ 12 മത്സരങ്ങൾ കളിച്ച റൊണാൾഡോ 13 ഗോളുകളും ഏഴ് അസിസ്റ്റുകളും സ്വന്തമാക്കിയിട്ടുണ്ട്. മാത്രമല്ല പോർച്ചുഗലിനു വേണ്ടിയും ഇദ്ദേഹം ആ മികവ് തുടരുന്നുണ്ട്. കഴിഞ്ഞ ദിവസം യൂറോ യോഗ്യതയിൽ നടന്ന മത്സരത്തിൽ റൊണാൾഡോ ഒരു ഗോൾ നേടിയിരുന്നു.

ഇപ്പോഴിതാ റൊണാൾഡോയെ കുറിച്ച് മാഞ്ചസ്റ്റർ സിറ്റിയുടെ സൂപ്പർ സ്ട്രൈക്കറായ ഏർലിംഗ് ഹാലന്റ് സംസാരിച്ചിട്ടുണ്ട്. റൊണാൾഡോ തനിക്ക് വലിയ ഒരു ഇൻസ്പിരേഷനാണ് എന്നാണ് ഹാലന്റ് പറഞ്ഞിട്ടുള്ളത്. റൊണാൾഡോയുടെ വീഡിയോകൾ എപ്പോഴും താൻ യൂട്യൂബിൽ കാണാറുണ്ടെന്നും ഹാലന്റ് കൂട്ടിച്ചേർത്തിട്ടുണ്ട്.ഒരു നോർവീജിയൻ ടെലിവിഷനോട് സംസാരിക്കുകയായിരുന്നു ഹാലന്റ്.അദ്ദേഹത്തിന്റെ വാക്കുകൾ ഇങ്ങനെയാണ്.

“ക്രിസ്റ്റ്യാനോ റൊണാൾഡോ എന്നെ സംബന്ധിച്ചിടത്തോളം വലിയ ഒരു ഇൻസ്പിരേഷൻ തന്നെയാണ്.പ്രത്യേകിച്ച് പെനാൽറ്റി ഏരിയയിലെ കളി മികവിൽ.അദ്ദേഹത്തിന്റെ വീഡിയോസ് ഞാൻ യൂട്യൂബിൽ കാണാറുണ്ട്. അദ്ദേഹം അദ്ദേഹത്തിന്റെ കളി വികസിപ്പിച്ച രീതി വളരെ മനോഹരമാണ്. തുടക്കകാലത്ത് മാഞ്ചസ്റ്റർ യുണൈറ്റഡിലും റയൽ മാഡ്രിഡിലും വിങറായി കളിച്ച അദ്ദേഹം പിന്നീട് മികച്ച ഒരു സ്ട്രൈക്കർ ആയി മാറി. അത് തീർത്തും അവിശ്വസനീയമാണ് ” ഇതാണ് ഹാലന്റ് പറഞ്ഞിട്ടുള്ളത്.

കഴിഞ്ഞ സീസണിൽ ഗോൾ അടിച്ചു കൊണ്ട് നിരവധി റെക്കോർഡുകൾ സ്വന്തമാക്കിയ താരമാണ് ഹാലന്റ്. ഈ സീസണിലും കാര്യങ്ങൾക്ക് മാറ്റം ഒന്നുമില്ല.12 പ്രീമിയർ ലീഗ് മത്സരങ്ങളിൽ നിന്ന് 13 ഗോളുകൾ ഹാലന്റ് സ്വന്തമാക്കിയിട്ടുണ്ട്. കഴിഞ്ഞ ബാലൺഡി’ഓർ പുരസ്കാരത്തിൽ രണ്ടാം സ്ഥാനം നേടാൻ ഹാലന്റിന് സാധിച്ചിരുന്നു.