കൊളംബിയക്കെതിരെയുള്ള വിജയം,നെയ്മറെ എടുത്തുയർത്തി ആരാധകൻ!

ഇന്ന് നടന്ന വേൾഡ് കപ്പ് യോഗ്യത മത്സരത്തിൽ എതിരില്ലാത്ത ഒരു ഗോളിനായിരുന്നു ബ്രസീൽ കൊളംബിയയെ പരാജയപ്പെടുത്തിയത്. മത്സരത്തിന്റെ 72-ആം മിനുട്ടിൽ സൂപ്പർ താരം നെയ്മർ ജൂനിയറുടെ അസിസ്റ്റിൽ നിന്ന് ലുകാസ് പക്വറ്റയാണ് ബ്രസീലിന്റെ വിജയഗോൾ നേടിയത്. ജയത്തോടെ ബ്രസീൽ ഖത്തർ വേൾഡ് കപ്പിന് യോഗ്യത നേടുകയും ചെയ്തു.

മത്സരത്തിൽ സൂപ്പർ താരം നെയ്മർ ജൂനിയർ മികച്ച പ്രകടനമായിരുന്നു കാഴ്ച്ചവെച്ചിരുന്നത്. മത്സരശേഷം നെയ്മർക്ക്‌ ഒരു ആരാധകന്റെ ഇടപെടൽ നേരിടേണ്ടി വന്നിരുന്നു. കളത്തിലേക്ക് ഓടിയെത്തിയ ആരാധകൻ നെയ്മർ ജൂനിയറെ എടുത്തുയർത്തുകയായിരുന്നു. ആദ്യം നെയ്മർ ജൂനിയർ ഒരു ഞെട്ടൽ പ്രകടിപ്പിച്ചുവെങ്കിലും പിന്നീട് അദ്ദേഹത്തെ ആലിംഗനം ചെയ്യാൻ സമ്മതിക്കുകയായിരുന്നു. ഉടൻ തന്നെ സുരക്ഷാഉദ്യോഗസ്ഥർ ആ ആരാധകനെ പിടിച്ചു മാറ്റുകയും ചെയ്തു.

ആരാധകർ കളിക്കളം കയ്യേറുന്നത് ഇപ്പോൾ ഫുട്ബോളിൽ നിത്യസംഭവമായി മാറിയിട്ടുണ്ട്. ബ്രസീലിന്റെ ഈ മത്സരത്തിനിടെ തന്നെ 12-ൽ പരം വ്യക്തികളാണ് കളത്തിലേക്കിറങ്ങാൻ ശ്രമിച്ചത്. എന്നാൽ ഇതെല്ലാം സുരക്ഷാഉദ്യോഗസ്ഥർ നിഷ്ഫലമാക്കി എന്നാണ് പ്രമുഖ ബ്രസീലിയൻ മാധ്യമമായ UOL റിപ്പോർട്ട്‌ ചെയ്തിട്ടുള്ളത്.ബ്രസീലിന്റെ മൈതാനത്ത് വെച്ചായിരുന്നു ഇന്നലെ മത്സരം അരങ്ങേറിയിരുന്നത്.

ഏതായാലും ഇത്തരം സംഭവവികാസങ്ങൾ താരങ്ങളുടെ സുരക്ഷക്ക്‌ ഭീഷണി ഉയർത്തുന്ന കാര്യമാണ്. പിഎസ്ജിക്ക്‌ വേണ്ടി കളിക്കുന്ന സമയത്ത് സൂപ്പർ താരം ലയണൽ മെസ്സിക്കും ഇത്തരത്തിലുള്ള അനുഭവം നേരിടേണ്ടി വന്നിരുന്നു. അന്ന് പിടിക്കപ്പെട്ട വ്യക്തിയിൽ അടിമുടി ദുരൂഹത നിറഞ്ഞു നിന്നതും ഏറെ ചർച്ചാവിഷയമായിരുന്നു.