എല്ലാ തർക്കങ്ങളും അവസാനിപ്പിച്ചു, വേൾഡ് കപ്പ് നേടിയതോടെ മെസ്സി GOAT ആയി: ഗാരി ലിനേക്കർ

ലയണൽ മെസ്സിയുടെ കരിയറിൽ നേടാൻ അവശേഷിച്ചിരുന്ന ഒരു നേട്ടമായിരുന്നു വേൾഡ് കപ്പ് കിരീടം. എന്നാൽ കഴിഞ്ഞ വർഷം ഖത്തറിൽ നടന്ന വേൾഡ് കപ്പ് അർജന്റീന മെസ്സിയുടെ ക്യാപ്റ്റൻസിയിൽ സ്വന്തമാക്കി. ഇതോടുകൂടി ലയണൽ മെസ്സി സമ്പൂർണ്ണനായിരുന്നു.GOAT അഥവാ ഫുട്ബോൾ ചരിത്രത്തിലെ എക്കാലത്തെയും മികച്ച താരമായി കൊണ്ടാണ് ഇപ്പോൾ പലരും ലയണൽ മെസ്സിയെ പരിഗണിക്കുന്നത്.

ഇംഗ്ലീഷ് ഇതിഹാസമായ ഗാരി ലിനെക്കറും ഇത് ശരിവെച്ചിട്ടുണ്ട്. വേൾഡ് കപ്പ് നേടിയതോടുകൂടി എല്ലാ തർക്കങ്ങളും അവസാനിപ്പിക്കാൻ ലയണൽ മെസ്സിക്ക് സാധിച്ചുവെന്നും ഫുട്ബോൾ ചരിത്രത്തിലെ എക്കാലത്തെയും മികച്ച താരം മെസ്സിയാണ് എന്നുമാണ് ലിനെക്കർ പറഞ്ഞിട്ടുള്ളത്.ഗോളിന് നൽകിയ പുതിയ അഭിമുഖത്തിൽ സംസാരിക്കുകയായിരുന്നു അദ്ദേഹം.ലിനെക്കറുടെ വാക്കുകൾ ഇങ്ങനെയാണ്.

” എന്നെ സംബന്ധിച്ചിടത്തോളം ഫുട്ബോൾ ചരിത്രത്തിലെ എക്കാലത്തെയും മികച്ച താരം ലയണൽ മെസ്സിയാണ്.അദ്ദേഹത്തിന്റെ കളി കാണുന്നത് തന്നെ സന്തോഷം നൽകുന്ന കാര്യമാണ്. കഴിഞ്ഞ രണ്ട് പതിറ്റാണ്ടായി മെസ്സി നമ്മെ ആനന്ദിപ്പിച്ചു കൊണ്ടിരിക്കുന്നു. മറ്റുള്ളവർക്ക് ചെയ്യാൻ കഴിയാത്ത കാര്യങ്ങൾ വളരെ നോർമലായി കൊണ്ട് അദ്ദേഹം ചെയ്യുന്നു.അദ്ദേഹം കളിക്കുന്ന എല്ലാ മത്സരങ്ങളും ഞാൻ കാണാറുണ്ട്. അദ്ദേഹത്തിന് നല്ല ദിവസങ്ങൾ അല്ലെങ്കിൽ പോലും,എനിക്കൊന്നും എന്റെ കരിയറിൽ ഇതുവരെ ചെയ്യാൻ സാധിക്കാത്ത കാര്യങ്ങൾ ഒരു മത്സരത്തിൽ തന്നെ മൂന്നോ നാലോ തവണ മെസ്സി ചെയ്തിരിക്കും. സത്യം പറഞ്ഞാൽ വേൾഡ് കപ്പോടുകൂടി എല്ലാ തർക്കങ്ങളും അവസാനിപ്പിക്കുകയാണ് മെസ്സി ചെയ്തത് ” ഇതാണ് ലിനെക്കർ പറഞ്ഞിട്ടുള്ളത്.

വേൾഡ് കപ്പ് നേടിയതിന് പിന്നാലെ ലയണൽ മെസ്സി യൂറോപ്പ്യൻ ഫുട്ബോൾ അവസാനിപ്പിച്ചിരുന്നു.നിലവിൽ അമേരിക്കയിൽ ആണ് മെസ്സി കളിച്ചുകൊണ്ടിരിക്കുന്നത്. അവിടെ നാലു മത്സരങ്ങൾ കളിച്ച മെസ്സി ഏഴ് ഗോളുകളും ഒരു അസിസ്റ്റും നേടിക്കഴിഞ്ഞു.