എംബപ്പേയെ ദിവസേന കാണുമ്പോൾ സ്പെയിനുകാർ അദ്ദേഹത്തിന്റെ മഹത്വം മനസ്സിലാക്കും :ചുവാമെനി

ഫ്രഞ്ച് സൂപ്പർ താരമായ കിലിയൻ എംബപ്പേ വരുന്ന സമ്മർ ട്രാൻസ്ഫർ ജാലകത്തിലാണ് റയൽ മാഡ്രിഡിലേക്ക് എത്തുക.ഫ്രീ ഏജന്റായി കൊണ്ടാണ് അദ്ദേഹം പിഎസ്ജി വിടുക.എന്നാൽ ഇക്കാര്യത്തിൽ ഒഫീഷ്യൽ പ്രഖ്യാപനങ്ങൾ ഒന്നും തന്നെ വന്നിട്ടില്ല.എംബപ്പേയോ രണ്ട് ക്ലബ്ബുകളോ ഇക്കാര്യത്തിൽ സ്റ്റേറ്റ്മെന്റുകൾ ഒന്നും ഇറക്കിയിട്ടില്ല.മാധ്യമങ്ങളും മാധ്യമപ്രവർത്തകരുമാണ് ഇക്കാര്യം സ്ഥിരീകരിച്ചിട്ടുള്ളത്.

റയൽ മാഡ്രിഡിന്റെ സൂപ്പർതാരമായ ഷുവാമെനി ഫ്രഞ്ച് ദേശീയ ടീമിൽ എംബപ്പേയുടെ സഹതാരമാണ്.എംബപ്പേ റയലിലേക്ക് എത്തും എന്നുള്ള ഒരു സൂചന ഷുവാമെനി തന്നെ ഇപ്പോൾ നൽകിയിട്ടുണ്ട്. അതായത് കിലിയൻ എംബപ്പേയെ കുറിച്ച് സ്പാനിഷ് ജനതയുടെ അഭിപ്രായങ്ങളെ എങ്ങനെ നോക്കി കാണുന്നു എന്നാണ് ഷുവാമെനിയോട് ചോദിക്കപ്പെട്ടത്.അതിന് അദ്ദേഹം മറുപടി നൽകിയത് ഇങ്ങനെയാണ്.

“കിലിയൻ എംബപ്പേ ഏത് തരത്തിലുള്ള ഒരു താരമാണ് എന്ന കാര്യം സ്പാനിഷ് ജനതയ്ക്ക് അറിയാം. ഇനി ദൈനംദിനം കിലിയൻ എംബപ്പേയെ കാണുമ്പോൾ അവർ മനസ്സിലാക്കും എംബപ്പേ എന്ന താരത്തിന്റെ മഹത്വം എത്രത്തോളം ഉണ്ടെന്ന് ” ഇതായിരുന്നു ഷുവാമെനി പറഞ്ഞിരുന്നത്.

അതായത് സ്ഥിരമായി എംബപ്പേ സ്പെയിനിൽ കളിക്കും എന്ന് തന്നെയാണ് ഇദ്ദേഹത്തിന്റെ വാക്കുകളിൽ നിന്നും വ്യക്തമാകുന്നത്. ഫ്രഞ്ച് മാധ്യമമായ ടെലിഫൂട്ടായിരുന്നു ഈ വീഡിയോ പുറത്ത് വിട്ടത്.എന്നാൽ കുറച്ച് നിമിഷങ്ങൾക്ക് ശേഷം അവർ അത് ഡിലീറ്റ് ചെയ്യുകയും ചെയ്തു.

എംബപ്പേയുടെ ഭാവിയെ കുറിച്ച് അദ്ദേഹത്തോട് തന്നെ മാധ്യമപ്രവർത്തകർ ചോദിച്ചിരുന്നു. വരുന്ന യൂറോ കപ്പോടുകൂടി ഭാവി വ്യക്തമാക്കും എന്നായിരുന്നു എംബപ്പേ പറഞ്ഞിരുന്നത്. അദ്ദേഹം റയൽ മാഡ്രിഡിനെ തിരഞ്ഞെടുത്തു എന്നത് പല മാധ്യമപ്രവർത്തകരും സ്ഥിരീകരിച്ച കാര്യമാണ്.