ഇംഗ്ലണ്ടും നെതർലാൻഡ്സും കളത്തിൽ,വേൾഡ് കപ്പിൽ ഇന്ന് മിന്നും മത്സരങ്ങൾ.

ഖത്തർ വേൾഡ് കപ്പിൽ ഇന്ന് ഒരുപിടി സൂപ്പർ പോരാട്ടങ്ങളാണ് ഫുട്ബോൾ ആരാധകരെ കാത്തിരിക്കുന്നത്. യൂറോപ്യൻ വമ്പൻമാരായ ഇംഗ്ലണ്ടും നെതർലാന്റ്സുമൊക്കെ ഇന്ന് കളത്തിൽ ഇറങ്ങുന്നുണ്ട്. ആഫ്രിക്കൻ ചാമ്പ്യന്മാരായ സെനഗലാണ് ഇന്ന് നെതർലാന്റ്സിന് വെല്ലുവിളി ഉയർത്തുക.ആകെ 3 മത്സരങ്ങളാണ് ഇന്ന് വേൾഡ് കപ്പിൽ നടക്കുന്നത്.

ഇംഗ്ലണ്ടും ഇറാനും തമ്മിലുള്ള മത്സരമാണ് ആദ്യം അരങ്ങേറുക. ഇന്ന് വൈകിട്ട് 6:30ന് ഖലീഫ ഇന്റർനാഷണൽ സ്റ്റേഡിയത്തിൽ വെച്ചാണ് മത്സരം നടക്കുക. ഒരുപിടി സൂപ്പർതാരങ്ങളുമായാണ് ഇംഗ്ലണ്ട് ഈ മത്സരത്തിന് വരുന്നത്.ഗാരെത് സൗത്ത്ഗേറ്റ് ഏത് രൂപത്തിലുള്ള ഒരു ഇലവനെ ആയിരിക്കും മത്സരത്തിൽ ഇറക്കുക എന്നുള്ളതാണ് ആരാധകർ ഉറ്റുനോക്കുന്നത്.അതേസമയം ഏഷ്യയിൽ നിന്നും ഏറ്റവും ഉയർന്ന ഫിഫ റാങ്കിങ് കരസ്ഥമാക്കി കൊണ്ടാണ് ഇറാൻ വരുന്നത്. ഇംഗ്ലണ്ടിനെ വെല്ലുവിളി ഉയർത്താൻ തക്കവണ്ണമുള്ള ടീം ഇറാനിനുണ്ട്.

മറ്റൊരു മത്സരത്തിൽ നെതർലാൻസും ആഫ്രിക്കൻ ചാമ്പ്യന്മാരായ സെനഗലും തമ്മിലാണ് ഏറ്റുമുട്ടുക.സാഡിയോ മാനെയുടെ പരിക്കാണ് സെനഗലിനെ സംബന്ധിച്ചിടത്തോളം ഏറ്റവും വലിയ തിരിച്ചടി. എന്നിരുന്നാൽ പോലും പ്രധാനപ്പെട്ട താരങ്ങൾ അവർക്കുണ്ട്.അതേസമയം വാൻ ഡൈക്ക്,ഡി യോങ്,ഡീപേ തുടങ്ങിയ താരങ്ങളിൽ പ്രതീക്ഷ അർപ്പിച്ചു കൊണ്ടാണ് ഡച്ച് പട കളത്തിലേക്ക് ഇറങ്ങുക.ഇന്ന് രാത്രി 9 :30നാണ് ഈ മത്സരം നടക്കുക. ഒരു കടുത്ത പോരാട്ടം തന്നെയാണ് ആരാധകർ പ്രതീക്ഷിക്കുന്നത്.

ഇന്ന് നടക്കുന്ന മറ്റൊരു മത്സരം USA യും വെയിൽസും തമ്മിലാണ്. ദീർഘകാലത്തിന് ശേഷമാണ് ഇപ്പോൾ വെയിൽസ് വേൾഡ് കപ്പ് കളിക്കാൻ ഒരുങ്ങുന്നത്. സൂപ്പർതാരം ഗാരെത് ബെയ്ൽ തന്നെയാണ് അവരുടെ വജ്രായുധം. കൂടാതെ ഡാനിയേൽ ജയിംസ്,ആരോൺ റാംസി എന്നിവരും അവരുടെ നിരയിലുണ്ട്. അതേസമയം USA യിലും ഒരുപിടി മികച്ച താരങ്ങളുണ്ട്.പുലിസിച്ച്,റെയ്ന,മക്കെന്നി,ഡെസ്റ്റ് തുടങ്ങിയ സൂപ്പർതാരങ്ങൾ USA നിരയിലുണ്ട്. ഇന്ന് രാത്രി ഇന്ത്യൻ സമയം 12:30നാണ് ഈ മത്സരം നടക്കുക.