ഐഎസ്എൽ കിരീടം നേടാൻ കഴിയുന്ന ടീമാണ് ഞങ്ങളുടേത്, ലോബേറ പറയുന്നു !

ഐഎസ്എല്ലിൽ ഇന്നലെ നടന്ന മത്സരത്തിൽ ഈസ്റ്റ്‌ ബംഗാളിനെ എതിരില്ലാത്ത മൂന്ന് ഗോളുകൾക്ക്‌ തകർത്തു വിടാൻ മുംബൈ സിറ്റി എഫ്സിക്ക്‌ സാധിച്ചിരുന്നു. മത്സരത്തിൽ ലെ ഫോൻഡ്രേ ഇരട്ടഗോളുകൾ നേടിയപ്പോൾ ശേഷിച്ച ഗോൾ ഹെർനൻ സാന്റാന നേടുകയായിരുന്നു. ഇതോടെ പോയിന്റ് ടേബിളിൽ ഒന്നാം സ്ഥാനത്തേക്ക് കയറാൻ മുംബൈക്ക്‌ സാധിച്ചു. മൂന്നു മത്സരങ്ങളിൽ നിന്ന് ആറു പോയിന്റ് ആണ് മുംബൈയുടെ സമ്പാദ്യം. ജയത്തോടെ കടുത്ത ആത്മവിശ്വാസത്തിലാണ് പരിശീലകൻ സെർജിയോ ലൊബേറ. ഈ ഐഎസ്എൽ കിരീടം ചൂടാൻ കഴിവുള്ള സ്‌ക്വാഡ് ആണ് മുംബൈക്കുള്ളത് എന്നാണ് ഇദ്ദേഹത്തിന്റെ അഭിപ്രായം. ഇന്നലത്തെ മത്സരത്തിന് മാധ്യമങ്ങളോട് സംസാരിക്കുകയായിരുന്നു അദ്ദേഹം. ലീഗ് വിജയിക്കണമെങ്കിൽ നല്ലൊരു സ്‌ക്വാഡ് ആണ് ആവിശ്യമെന്നും അതിപ്പോൾ തനിക്കുണ്ട് എന്നുമാണ് ഇദ്ദേഹം അഭിപ്രായപ്പെട്ടിരിക്കുന്നത്.

” ഓരോ വ്യക്തികളെ കുറിച്ച് സംസാരിക്കാൻ ഞാൻ ഇഷ്ടപ്പെടുന്നില്ല. ഏറ്റവും പ്രധാനപ്പെട്ട കാര്യം ടീമായി പ്രവർത്തിക്കുക എന്നതാണ്. ഒരു ടീമായി കൊണ്ട് നല്ല രീതിയിൽ പ്രവർത്തിക്കാൻ കഴിഞ്ഞാൽ ഒരുപാട് മുന്നേറാൻ സാധിക്കും. എനിക്ക് നല്ലൊരു സ്‌ക്വാഡ് ഉണ്ട്. എന്നെ സംബന്ധിച്ചെടുത്തോളം അതാണ് ഏറ്റവും പ്രധാനപ്പെട്ടത്. നിങ്ങൾക്ക്‌ ഒരു മത്സരം വിജയിക്കണം എന്നുണ്ടെങ്കിൽ ഒരു നല്ല ഫസ്റ്റ് ഇലവനാണ് വേണ്ടത്. പക്ഷെ ഒരു ലീഗ് വിജയിക്കണമെങ്കിൽ അത്‌ പോരാ. മറിച്ച് നല്ലൊരു സ്‌ക്വാഡ് വേണം. തീർച്ചയായും എനിക്ക് അതുണ്ട്. ഈ ഐഎസ്എൽ കിരീടം നേടാൻ ശേഷിയുള്ള സ്‌ക്വാഡ് മുംബൈക്കുണ്ട് ” സെർജിയോ ലൊബേറ പറഞ്ഞു.