നടത്തുന്നത് അത്ഭുത പ്രകടനം, മൈക്കൽ ഓലിസിനെ പ്രശംസിച്ച് കൊമ്പനി!

ജർമ്മൻ വമ്പൻമാരായ ബയേൺ മ്യൂണിക്ക് ഇപ്പോൾ ഗംഭീര പ്രകടനമാണ് നടത്തിക്കൊണ്ടിരിക്കുന്നത്.ബുണ്ടസ് ലിഗയിൽ കളിച്ച നാല് മത്സരങ്ങളിലും അവർ വിജയിച്ചിട്ടുണ്ട്.ചാമ്പ്യൻസ് ലീഗിലെ ആദ്യ മത്സരത്തിൽ രണ്ടിനെതിരെ ഒൻപത് ഗോളുകൾക്കായിരുന്നു അവർ വിജയിച്ചിരുന്നത്. അവസാനത്തെ മൂന്നു മത്സരങ്ങളിൽ നിന്ന് മാത്രമായി 20 ഗോളുകളാണ് ബയേൺ നേടിയിട്ടുള്ളത്. പുതിയ പരിശീലകനായ വിൻസന്റ് കൊമ്പനിയുടെ കീഴിൽ മികച്ച തുടക്കമാണ് അവർക്ക് ലഭിച്ചിട്ടുള്ളത്.

ഫ്രഞ്ച് യുവ പ്രതിഭയായ മൈക്കൽ ഓലിസ് ബയേണിന് വേണ്ടി അത്ഭുതപ്പെടുത്തുന്ന പ്രകടനം പുറത്തെടുക്കുന്നുണ്ട്.ഇന്നലെ നടന്ന മത്സരത്തിൽ രണ്ട് ഗോളുകളും രണ്ട് അസിസ്റ്റുകളും അദ്ദേഹം നേടിയിരുന്നു.അവസാനത്തെ മൂന്നു മത്സരങ്ങളിൽ നിന്ന് 7 ഗോൾ പങ്കാളിത്തങ്ങൾ അദ്ദേഹം വഹിച്ചിട്ടുണ്ട്. താരത്തിന്റെ മികവിനെ പ്രശംസിച്ചുകൊണ്ട് പരിശീലകനായ കൊമ്പനി രംഗത്ത് വന്നിട്ടുണ്ട്. ഒരു സമ്മർദ്ദവും ഇല്ലാതെ കളിക്കുന്ന താരം എന്നാണ് അദ്ദേഹം ഓലിസിനെ വിശേഷിപ്പിച്ചിട്ടുള്ളത്.പരിശീലകന്റെ വാക്കുകൾ ഇങ്ങനെയാണ്.

” മൈക്കൽ ഓലിസ് ഒരു സ്പെഷ്യൽ ടാലന്റാണ്. ഒരുപാട് മികച്ച താരങ്ങൾ ഉണ്ട് എന്നത് ബയേണിനെ സംബന്ധിച്ചിടത്തോളം ഒരു ആഡംബരമാണ്.വളരെ മികച്ച രൂപത്തിലാണ് അദ്ദേഹം കളിക്കുന്നത്.ഇതിനേക്കാൾ മികച്ച ഒരു തുടക്കം അദ്ദേഹത്തിന് ലഭിക്കാനില്ല.ഈ രൂപത്തിൽ തന്നെ അദ്ദേഹം മുന്നോട്ട് പോകേണ്ടതുണ്ട്. സമ്മർദ്ദം ഇല്ലാതെ കളിക്കുന്ന താരങ്ങളിൽ ഒരാൾ കൂടിയാണ് അദ്ദേഹം ” ഇതാണ് പരിശീലകൻ താരത്തെ കുറിച്ച് പറഞ്ഞിട്ടുള്ളത്.

22 കാരനായ താരം ജർമൻ ലീഗിൽ മൂന്ന് ഗോളുകളും രണ്ട് അസിസ്റ്റുകളും ആണ് നേടിയിട്ടുള്ളത്.കഴിഞ്ഞ സീസണിൽ ഇംഗ്ലീഷ് പ്രീമിയർ ലീഗ് ക്ലബ്ബായ ക്രിസ്റ്റൽ പാലസിന് വേണ്ടി കളിച്ചിട്ടുള്ള താരമാണ് ഓലിസ്. ഫ്രഞ്ച് ദേശീയ ടീമിന് വേണ്ടി അരങ്ങേറ്റം നടത്താനും ഈ താരത്തിന് ഇപ്പോൾ സാധിച്ചിട്ടുണ്ട്.