അധിക ജോലി ചെയ്തു കൊണ്ടാണ് ഞാൻ റൊണാൾഡീഞ്ഞോയുടെ ജേഴ്‌സി വാങ്ങിയത് : തന്റെ ആരാധനാപാത്രങ്ങളെ വെളിപ്പെടുത്തി മാനെ!

ഈ ട്രാൻസ്ഫർ ജാലകത്തിലായിരുന്നു സൂപ്പർ താരം സാഡിയോ മാനെ ലിവർപൂൾ വിട്ടുകൊണ്ട് ബയേണിൽ എത്തിയത്. ബയേണിനൊപ്പം DFL സൂപ്പർ കപ്പ് നേടാൻ മാനെക്ക് ഇപ്പോൾ സാധിച്ചിട്ടുണ്ട്.ബയേണിന് വേണ്ടി താരം ഇതുവരെ രണ്ട് ഗോളുകൾ നേടുകയും ചെയ്തിട്ടുണ്ട്.

ഏതായാലും ബയേണിന്റെ ഒഫീഷ്യൽ വെബ്സൈറ്റിന് കഴിഞ്ഞ ദിവസം താരം ഒരു അഭിമുഖം നൽകിയിരുന്നു.തന്റെ ഐഡോളുകൾ അഥവാ ആരാധന പാത്രങ്ങൾ ആരൊക്കെയാണ് എന്നുള്ളത് മാനെ വെളിപ്പെടുത്തിയിട്ടുണ്ട്. ബ്രസീലിയൻ ഇതിഹാസമായ റൊണാൾഡീഞ്ഞോ,സെനഗലീസ് ഇതിഹാസമായ ദിയൂഫ് എന്നിവരാണ് തന്റെ ഐഡോളുകൾ എന്നാണ് മാനേ പറഞ്ഞിട്ടുള്ളത്. അദ്ദേഹത്തിന്റെ വാക്കുകൾ ഇങ്ങനെയാണ്.

“എന്റെ ഐഡോളുകൾ റൊണാൾഡീഞ്ഞോയും എൽ ഹാജി ദിയൂഫുമാണ്.അവർ അസാധാരണ താരങ്ങളായിരുന്നു.അവരുടെ വീഡിയോകൾ ഞാൻ മണിക്കൂറുകളോളം കാണുമായിരുന്നു.മാത്രമല്ല അവർ ചെയ്തതെല്ലാം അനുകരിക്കാൻ ശ്രമിക്കുമായിരുന്നു. എന്റെ അമ്മ എനിക്ക് ദിയൂഫിന്റെ ഒരു ജേഴ്സി വാങ്ങി തന്നിരുന്നു. ഞാൻ കുറച്ചുകൂടി വലുതായപ്പോൾ റൊണാൾഡീഞ്ഞോയുടെ ജേഴ്‌സി ഞാൻ തന്നെ സ്വയം വാങ്ങിച്ചു. അധികം ജോലി ചെയ്തു കൊണ്ടായിരുന്നു ഞാൻ അതിനുള്ള പണം കണ്ടെത്തിയിരുന്നത്.അദ്ദേഹത്തിന്റെ പേരുള്ള ഒരു ജേഴ്സി അണിയുക എന്നുള്ളത് ഒരു സ്വപ്നമായിരുന്നു.അദ്ദേഹത്തിന്റെ ജേഴ്‌സി ഊരിമാറ്റാൻ പോലും ഞാൻ ഇഷ്ടപ്പെട്ടിരുന്നില്ല. പിന്നീട് ഓരോ ദിവസവും ഞാൻ അദ്ദേഹത്തിന്റെ തന്നെ വ്യത്യസ്ത ജേഴ്സികൾ അണിഞ്ഞു ” ഇതാണ് മാനെ പറഞ്ഞിട്ടുള്ളത്.

ഈ സീസണിനെ വലിയ പ്രതീക്ഷകളോടുകൂടിയാണ് താരം നോക്കിക്കാണുന്നത്.സെനഗലിൽ നിന്നും ഒരുപാട് ആരാധകർ ഇനി ബയേണിന് ഉണ്ടാവുമെന്നുള്ള പ്രതീക്ഷയും ഇദ്ദേഹം പങ്കുവെച്ചിട്ടുണ്ട്.