ബ്രെയ്സുമായി റൊണാൾഡോ,അൽ അഹ്ലിക്കെതിരെ വിജയവുമായി അൽ നസ്ർ.

ഇന്നലെ സൗദി അറേബ്യൻ ലീഗിൽ നടന്ന മത്സരത്തിൽ വിജയം നേടാൻ ക്രിസ്റ്റ്യാനോ റൊണാൾഡോയുടെ ക്ലബ്ബായ അൽ നസ്റിന് സാധിച്ചിട്ടുണ്ട്. മറ്റൊരു വമ്പൻമാരായ അൽ അഹ്ലിയെ മൂന്നിനെതിരെ നാല് ഗോളുകൾക്കാണ് അൽ നസ്ർ പരാജയപ്പെടുത്തിയിട്ടുള്ളത്. സൂപ്പർ താരം ക്രിസ്റ്റ്യാനോ റൊണാൾഡോ തന്നെയാണ് ഈ മത്സരത്തിൽ തിളങ്ങിയിട്ടുള്ളത്.

രണ്ട് ഗോളുകളാണ് റൊണാൾഡോ മത്സരത്തിൽ നേടിയത്. ശേഷിച്ച രണ്ട് ഗോളുകൾ ടാലിസ്‌ക്കയുടെ വകയായിരുന്നു. അതേസമയം മറുഭാഗത്ത് അൽ അഹ്ലിക്ക് വേണ്ടി കെസ്സിയും മഹ്റസുമൊക്കെ ഗോൾ നേടിയിരുന്നു.ആവേശകരമായ പോരാട്ടത്തിൽ ക്രിസ്റ്റ്യാനോ മികച്ച പ്രകടനമാണ് നടത്തിയത്. മത്സരത്തിന്റെ നാലാം മിനിറ്റിൽ തന്നെ മാനെയുടെ അസിസ്റ്റിൽ നിന്ന് റൊണാൾഡോ ഗോൾ നേടിയിരുന്നു. പിന്നീട് 52 മിനിറ്റിലാണ് ടാലിസ്ക്കയുടെ അസിസ്റ്റിൽ നിന്ന് റൊണാൾഡോയുടെ ഗോൾ പിറന്നത്.

ഏതായാലും മികച്ച പ്രകടനം നടത്തുന്ന റൊണാൾഡോ ഇതിനോടകം തന്നെ ലീഗിൽ 9 ഗോളുകൾ പൂർത്തിയാക്കി കഴിഞ്ഞു. 15 പോയിന്റ് ഉള്ള അൽ നസ്ർ ഇപ്പോൾ അഞ്ചാം സ്ഥാനത്താണ്. ഇനി അടുത്ത മത്സരത്തിൽ അൽ തായിയാണ് ഇവരുടെ എതിരാളികൾ.