ഞാൻ കളിക്കുന്നത് പണത്തിനു വേണ്ടി,ക്രിസ്റ്റ്യാനോയും അങ്ങനെ തന്നെ: അൽ ഹിലാൽ താരം പറയുന്നു.

കഴിഞ്ഞ ജനുവരി ട്രാൻസ്ഫർ ജാലകത്തിലായിരുന്നു ക്രിസ്റ്റ്യാനോ റൊണാൾഡോ സൗദി അറേബ്യൻ ക്ലബ്ബായ അൽ നസ്റിലേക്ക് എത്തിയത്. റെക്കോർഡ് സാലറിയാണ് അദ്ദേഹത്തിന് ഇപ്പോൾ ലഭിക്കുന്നത്. കഴിഞ്ഞ സീസണിൽ സൗദി അറേബ്യൻ ലീഗിൽ ടോപ് സ്കോററായത് അൽ ഹിലാലിന്റെ നൈജീരിയൻ സ്ട്രൈക്കറായ ഒഡിയോൻ ഇഗ്‌ഹാലോയായിരുന്നു. എന്നാൽ സീസൺ അവസാനിച്ചതോടുകൂടി അദ്ദേഹം അൽ ഹിലാൽ വിടുകയും ചെയ്തിട്ടുണ്ട്.

ഏതായാലും സൗദി അറേബ്യൻ ഫുട്ബോളിനെ കുറിച്ച് ഇഗ്‌ഹാലോ ചില കാര്യങ്ങൾ പറഞ്ഞിട്ടുണ്ട്. അതായത് താൻ സൗദിയിൽ കളിച്ചത് പണത്തിനു വേണ്ടിയാണെന്നും ഇപ്പോൾ ക്രിസ്റ്റ്യാനോ റൊണാൾഡോ കളിക്കുന്നതും പണത്തിന് വേണ്ടിയാണെന്നുമാണ് ഇഗ്‌ഹാലോ പറഞ്ഞിട്ടുള്ളത്.അതിന്റെ കാരണവും താരം വിശദീകരിക്കുന്നുണ്ട്. അദ്ദേഹത്തിന്റെ വാക്കുകളെ ഗോൾ ഡോട്ട് കോം റിപ്പോർട്ട് ചെയ്യുന്നത് ഇങ്ങനെയാണ്.

“തീർച്ചയായും നിങ്ങൾ യുവതാരമായിരിക്കുമ്പോൾ പാഷന് വേണ്ടിയാണ് നിങ്ങൾ കളിക്കുക. ആ സമയത്ത് നിങ്ങൾ പണത്തിന് പ്രാധാന്യം നൽകില്ല.പക്ഷേ ഞാൻ ഇപ്പോൾ ഉള്ളത് എന്റെ കരിയറിന്റെ അവസാനഘട്ടത്തിലാണ്. ഈ പ്രായത്തിൽ തീർച്ചയായും നമ്മൾ പണത്തിന് പ്രാധാന്യം നൽകും. ഞാൻ ഇനി മൂന്നുവർഷത്തേക്കാൾ കൂടുതൽ കളിക്കില്ല എന്നെനിക്കുറപ്പാണ്. എന്റെ ജീവിതത്തിൽ ഉടനീളം ഞാൻ പാഷന് വേണ്ടിയാണ് കളിച്ചത്.പക്ഷേ ഇപ്പോൾ ഞാൻ സൗദിയിൽ കളിച്ചത് പണത്തിനു വേണ്ടിയാണ്.ഞാനൊരിക്കലും നിങ്ങളോട് കള്ളം പറയില്ല.ഞാൻ പണത്തിനു വേണ്ടിയാണ് കളിച്ചത്.എനിക്ക് തോന്നുന്നത് റൊണാൾഡോയും പണത്തിനു വേണ്ടിയാണ് ഇപ്പോൾ കളിക്കുന്നത് എന്നാണ്.എന്നെക്കാൾ 100 ഇരട്ടി പണം റൊണാൾഡോ സമ്പാദിക്കുന്നുണ്ട്. അദ്ദേഹം സൗദിയിലേക്ക് വന്നത് ഒരിക്കലും പാഷന് വേണ്ടിയല്ല. മറിച്ച് പണത്തിനു വേണ്ടിയാണ് ” ഇതാണ് ഇഗ്‌ഹാലോ പറഞ്ഞിട്ടുള്ളത്.

ക്രിസ്റ്റ്യാനോ റൊണാൾഡോക്ക് പിന്നാലെ നിരവധി സൂപ്പർതാരങ്ങൾ സൗദി അറേബ്യയിൽ എത്തിയിട്ടുണ്ട്.കരിം ബെൻസിൻയും കാന്റെയും ഫിർമിനോയും എല്ലാം ഇപ്പോൾ സൗദി അറേബ്യയിലാണ് ഉള്ളത്. വലിയ രൂപത്തിലുള്ള സാലറിയാണ് ഈ താരങ്ങൾ എല്ലാവരും സൗദി അറേബ്യൻ ക്ലബ്ബുകളിൽ നിന്നും കൈപ്പറ്റി കൊണ്ടിരിക്കുന്നത്.