ക്രിസ്റ്റ്യാനോയാണ് ലോകത്തെ ഏറ്റവും മികച്ച താരം : ബ്രസീലിയൻ ഗോൾകീപ്പർ

ഈ ജനുവരി ട്രാൻസ്ഫർ വിൻഡോയിലായിരുന്നു സൂപ്പർ താരം ക്രിസ്റ്റ്യാനോ റൊണാൾഡോ സൗദി അറേബ്യൻ ക്ലബ്ബായ അൽ നസ്റിലേക്ക് എത്തിയത്.അൽ നസ്റിന് വേണ്ടിയുള്ള അരങ്ങേറ്റം ക്രിസ്റ്റ്യാനോ റൊണാൾഡോ പൂർത്തിയാക്കുകയും ചെയ്തിരുന്നു.ഇത്തിഫാക്കിനെതിരെ നടന്ന മത്സരത്തിൽ ഗോളുകളോ അസിസ്റ്റുകളോ നേടാൻ അദ്ദേഹത്തിന് കഴിഞ്ഞിരുന്നില്ല.പക്ഷേ മോശമല്ലാത്ത രൂപത്തിൽ റൊണാൾഡോ കളിക്കുകയും ചെയ്തിരുന്നു.

ഈ മത്സരത്തിനുശേഷം റൊണാൾഡോയെ പ്രശംസിച്ചുകൊണ്ട് ഇത്തിഫാക്കിന്റെ ബ്രസീലിയൻ ഗോൾകീപ്പറായ പൗലോ വിക്ടർ രംഗത്ത് വന്നിട്ടുണ്ട്. ഫുട്ബോൾ ലോകത്തെ ഏറ്റവും മികച്ച താരം ക്രിസ്റ്റ്യാനോ റൊണാൾഡോയാണ് എന്നാണ് ഈ ബ്രസീലിയൻ ഗോൾകീപ്പർ പറഞ്ഞിട്ടുള്ളത്. അദ്ദേഹത്തിന്റെ വാക്കുകളെ പോർച്ചുഗീസ് മാധ്യമമായ എ ബോല റിപ്പോർട്ട് ചെയ്യുന്നത് ഇങ്ങനെയാണ്.

” എന്നെ സംബന്ധിച്ചിടത്തോളം ക്രിസ്റ്റ്യാനോ റൊണാൾഡോയാണ് ലോകത്തിലെ ഏറ്റവും മികച്ച താരം.എനിക്ക് അദ്ദേഹത്തോട് വളരെയധികം ആരാധനയുണ്ട്.സൗദി അറേബ്യയിലേക്കുള്ള അദ്ദേഹത്തിന്റെ വരവ് വളരെ പ്രധാനപ്പെട്ട ഒരു കാര്യമാണ്.ഞങ്ങൾ ആഗ്രഹിച്ച ഒരു റിസൾട്ട് അല്ല കഴിഞ്ഞ മത്സരത്തിൽ ലഭിച്ചത്. പക്ഷേ റൊണാൾഡോക്കെതിരെ കളിച്ചു തലയുയർത്തി കൊണ്ടാണ് ഞങ്ങൾ ഇവിടെ നിന്നും മടങ്ങുന്നത് ” ഇതാണ് പൗലോ വിക്ടർ പറഞ്ഞിട്ടുള്ളത്.

പിഎസ്ജിക്കെതിരെയുള്ള സൗഹൃദ മത്സരത്തിൽ രണ്ട് ഗോളുകൾ നേടിക്കൊണ്ട് മാൻ ഓഫ് ദി മാച്ച് പുരസ്കാരം സ്വന്തമാക്കാൻ റൊണാൾഡോക്ക് കഴിഞ്ഞിരുന്നു.ഇനി അൽ നസ്ർ അൽ ഇത്തിഹാദിനെതിരെയാണ് അടുത്ത മത്സരം കളിക്കുക. ഈ സൂപ്പർ കപ്പ് സെമി ഫൈനൽ മത്സരം ജനുവരി 26ആം തീയതിയാണ് നടക്കുക.