കരുത്തുറ്റ ടീമിനെതിരെ മികച്ച പ്രകടനം : PSGയെ സമനിലയിൽ തളച്ചതിനുശേഷമുള്ള ക്രിസ്റ്റ്യാനോയുടെ വാക്കുകൾ!

ഇന്നലെ നടന്ന സൗഹൃദ മത്സരത്തിൽ വമ്പൻമാരായ പിഎസ്ജിയും അൽ നസ്റും തമ്മിലായിരുന്നു ഏറ്റുമുട്ടിയിരുന്നത്.എന്നാൽ ഈ മത്സരം സമനിലയിൽ കലാശിക്കുകയായിരുന്നു. രണ്ട് ടീമുകൾക്കും മത്സരത്തിൽ ഗോളുകൾ ഒന്നും നേടാൻ കഴിഞ്ഞിരുന്നില്ല. ജപ്പാനിൽ വച്ചായിരുന്നു ഈ മത്സരം അരങ്ങേറിയിരുന്നത്.

സൂപ്പർ താരം ക്രിസ്റ്റ്യാനോ റൊണാൾഡോ മത്സരത്തിന്റെ 66ആം മിനിറ്റ് വരെ കളിച്ചിരുന്നു.അതേസമയം മറ്റൊരു സൂപ്പർതാരമായ നെയ്മർ ജൂനിയർ ഈ മത്സരത്തിൽ കളിച്ചിരുന്നില്ല.ക്രിസ്റ്റ്യാനോ റൊണാൾഡോയുടെ ബൈസിക്കിൾ കിക്ക് ശ്രമമൊക്കെ വലിയ രൂപത്തിൽ ആരാധകർ ശ്രദ്ധ പിടിച്ചു പറ്റിയ ഒന്നാണ്. ഏതായാലും ഈ മത്സരത്തിനുശേഷം ക്രിസ്റ്റ്യാനോ തന്റെ ആരാധകർക്കായി ഇൻസ്റ്റഗ്രാമിൽ ഒരു പോസ്റ്റ് പങ്കുവെച്ചിട്ടുണ്ട്. താരത്തിന്റെ വാക്കുകൾ ഇങ്ങനെയാണ്.

” ഒരു കരുത്തുറ്റ ടീമിനെതിരെ മികച്ച പ്രകടനം നടത്താൻ നമുക്കായി. നമ്മുടെ പ്രീ സീസൺ തയ്യാറെടുപ്പുകൾ തുടരുകയാണ്. ജപ്പാനിലെ ആരാധകർ ഫന്റാസ്റ്റിക്കായിട്ടുള്ള ഒരു വരവേൽപ്പാണ് ഞങ്ങൾക്ക് നൽകിയിട്ടുള്ളത് ” ഇതാണ് റൊണാൾഡോ തന്റെ ഇൻസ്റ്റഗ്രാമിൽ കുറിച്ചിട്ടുള്ളത്.

ഈ പ്രീ സീസൺ ക്രിസ്റ്റ്യാനോയെ സംബന്ധിച്ചിടത്തോളം വളരെ ബുദ്ധിമുട്ടേറിയ ഒന്നാണ്. കാരണം മൂന്നു മത്സരങ്ങൾ അദ്ദേഹം കളിച്ചുകഴിഞ്ഞു. ഒരൊറ്റ ഗോൾ പോലും നേടാൻ ഇതുവരെ റൊണാൾഡോക്ക് കഴിഞ്ഞിട്ടില്ല. അടുത്ത മത്സരം കരുത്തരായ ഇന്റർ മിലാനെതിരെയാണ് അൽ നസ്ർ കളിക്കുക. ഈ സീസണിലെ റൊണാൾഡോയുടെ ആദ്യത്തെ ഗോൾ ഇന്ററിനെതിരെ പിറക്കുമോ എന്നതാണ് ആരാധകർക്ക് അറിയേണ്ടത്.